Turmystyq qatty qaldyqtar polıgony ýtılızatsııalyq alymdar esebinen salynýy múmkin

ASTANA. KAZINFORM — Qazaqstanda turmystyq qatty qaldyqtarǵa (TQQ) arnalǵan polıgondardy ýtılızatsııalyq alymdar esebinen salý máselesi pysyqtalyp jatyr. Bul týraly Ortalyq kommýnıkatsııalar qyzmetinde ótken brıfıngte QR ETRM Qaldyqtardy basqarý departamentiniń dırektory Rýslan Túkenov habarlady.

— 2024 jyly Úkimet 100 polıgon salý jónindegi jospardy bekitti. Qazirgi tańda osy jospar aıasynda 7 polıgon salyndy, al 54 nysan boıynsha tıisti jobalyq-smetalyq qujattama ázirlendi. Jalpy, jergilikti atqarýshy organdar tarapynan belgili bir jumys júrgizilip jatyr, bári bıýdjettik qoldaýǵa baılanysty. Aıta ketý kerek, mundaı polıgondardy salý, paıdalanýǵa berý jáne olardy ári qaraı eksplýatatsııalaý tolyqtaı jergilikti atqarýshy organdardyń quzyretinde. Qazir biz osyndaı jobalardy ýtılızatsııalyq tólemder esebinen qarjylandyrý máselesin qarastyryp jatyrmyz. Jaqyn ýaqytta keshendi tásil aıasynda bul túıtkilder sheshimin tabady dep oılaımyn, — dedi spıker.

Aıta keteıik, Astanada «Taza Qazaqstan» jalpyulttyq aktsııasyn júzege asyrý jalǵasyp jatyr. Jyl boıy 328 zańsyz qoqys úıindileri joıylyp, 120 myń tonnadan astam qaldyqtar shyǵaryldy.

Sonymen qatar Astanada qoqys jaǵatyn zaýyt salynady.