Turmysqa shyǵýǵa kelisim bermegen: Nuraı Serikbaı isinde kýágerlerden jaýap alý aıaqtaldy

Sot otyrysynda marqumnyń jaqyn qurbysy, Almatydaǵy joǵary oqý ornynyń 3-kýrs stýdenti Álııa Serik jáne otbasynyń týysy Dáýren Jarylqasyn egjeı-tegjeıli jaýap berdi.

Aımahan jibergen gúldi qoqysqa tastaýdy ótindi: Nuraıdyń qurbysy

Sotta sóz alǵan Álııa Serik óz beınesin kórsetpeýdi surady. Qyz sol kúnderdi eske alý kezinde qatty qobaljyp, emotsııasyn áreń ustap otyrdy, daýysy birneshe ret dirildep, kózine jas aldy.

Álııa men Nuraı bala kezden birge ósip, týǵan ápke-sińlideı jaqyn bolǵan. Mektep bitirgennen keıin Álııa, Nuraı jáne Aqsezim Shattyq Almatydaǵy joǵary oqý oryndaryna túsip, birge páter jaldap turǵan.

Álııa aıyptalýshy Sherhan Aımahannyń Nuraımen aralarynda ózara qarym-qatynas bolǵany jáne turmys qurýdy josparlaǵany týraly nusqasyn joqqa shyǵardy.

Onyń aıtýynsha, Nuraı Aımahannan qatty qoryqqan, birneshe ret telefon nómirin aýystyryp, onymen baılanysty tolyq úzgisi kelgen.

– Men páterde jalǵyz bolǵanmyn. Bir kezde esikti toqtaýsyz qaqqan dybys estildi. Esik kózinen qaraǵanda adam kórinbedi, ol ádeıi shetke turyp, tek qolyn kórsetti. Esikti ashqanda aldymnan Sherhan Aımahan shyqty. Ol Nuraı men Aqsezimniń qaıda ekenin surady. Men úıde eshkim joq ekenin aıtyp, olar týraly málimet berýden bas tarttym. Onymen sóılesý úshin syrtqa shyǵýǵa da úzildi-kesildi kelispedim, sebebi qatty qoryqtym, – dedi Álııa Serik sotta.

Qurbysynyń aıtýynsha, aıyptalýshy olardyń úıiniń mańynda jıi bolǵan, ýnıversıtet ǵımaratyna kelip júrgen. Sonyń saldarynan qyzdar únemi qorqynyshta ómir súrip, páter aýystyrýdy josparlaǵan.

Álııa sondaı-aq aıyptalýshynyń Nuraı odan gúl syılaýdy surady, kóp aqsha aldy nemese ony temeki shegýge úıretti degen sózderin teriske shyǵardy.

– 11 qarashada, Nuraıdyń týǵan kúninde, ol Shymkentte júrgen kezde, Almatydaǵy páterimizdiń esigine Aımahannan úlken aq raýshan gúl shoǵy jetkizildi. Men Nuraıdan ne isteý keregin suradym. Ol gúldi dereý qoqysqa tastaýdy ótindi. Eger ol shynymen gúl jiberýdi surasa, Shymkentke jiberer edi. Biraq ol Nuraıdyń qaıda ekenin de bilmegen. Aqsha týraly aıtqandary da – taza ótirik. Nuraı tárbıeli otbasynan shyqqan, eshqandaı muqtajdyq kórmegen jáne bóten adamnan eshteńe suramas edi, – dedi kýáger.

Onyń aıtýynsha, Nuraı tipti dóreki sózder qoldanbaıtyn, bolashaǵyna úlken jospar qurǵan. Ol Eýropada magıstratýrada oqýdy jáne keıin ata-anasyna, Shymkentke oralýdy armandaǵan. Turmys qurýdy keminde alty-jeti jyldan keıin josparlaǵan.

Álııa 2025 jylǵy 4 qazanda Nuraı joǵalyp ketken kesh týraly da aıtty. Saǵat shamamen 21:30 kezinde Nuraı úı kıimimen, makııajsyz páterden shyǵyp ketken. Ol Aımahanmen sońǵy ret sóılesip, bárin anyqtap alǵysy keletinin aıtqan. Tún ortasynan keıin onymen baılanys úzilgen, telefonnyń ornalasqan jerin anyqtaý qyzmeti óshirilgen. Keıin sol ýaqytta aıyptalýshy qyzdy aldap, qorqytý arqyly Shymkent baǵytyna alyp ketkeni anyqtalǵan.

Jylap, meni bul úıden alyp ketińder dedi: Nuraıdyń týysy sotta jaýap berdi

Dáýren Jarylqasyn – Nuraı Serikbaıdyń naǵashy jaǵynan týysy, sondaı-aq aıyptalýshymen buryn birge jumys istegen. Ol Aımahannyń 2024 jyly ózderinde qoıma meńgerýshisi qyzmetin atqarǵanyn, onyń janjalǵa beıim ári ashýǵa tez beriletin adam bolǵanyn jetkizdi.

Dáýren sotta Aımahannyń Nuraıdy alǵash ret 2025 jylǵy 3 shildede toıda kórgenin eske aldy. Aıyptalýshynyń qyzǵa kóńil bildirýge tyrysqanyn bilgen soń, kýáger Nuraıdyń aǵasy Sultanǵa eskertip, Aımahan týraly jaǵymsyz pikir aıtqan.

Kýáger 2025 jylǵy 5 qazanda Nuraıdy Aımahannyń týystarynyń úıinde kúshtep ustap otyrǵan kezdegi jaǵdaıdy baıandady.

– Meni bul jaǵdaı týraly aıyptalýshynyń aǵasy Darhan habardar etti. Men birden Sultanǵa baryp, onymen birge kórsetilgen mekenjaıǵa bardyq. Bólmede shamamen 10 áıel boldy, esik jabyq turdy. Kirgen soń bizdi ońasha qaldyrýdy suradyq. Sultan: «Bul seniń sheshimiń be?» dep surady. Nuraı jylap: «Joq, men qorqamyn. Meni tezirek bul jerden alyp ketińder!» dedi. Biz onyń qolynan ustap, alyp shyǵýǵa tyrystyq. Biraq úıdegi adamdar bizge jabylyp, janjal shyqty. Qyzdy jibermeı, bizdi kúshpen syrtqa shyǵaryp jiberdi, – dedi Dáýren Jarylqasyn.

Kýágerdiń aıtýynsha, aıyptalýshynyń aǵasy birneshe ret «isti jaýyp», prokýratýraǵa bergen aryzdy qaıtaryp alýdy suraǵan. Ol Sherhannyń endi qyzǵa jaqyndamaıtynyn ýáde etken. Alaıda qarasha aıynda qýdalaý qaıta jalǵasqan.

Dáýren Jarylqasyn Aımahannyń buǵan deıin de oǵash áreketter kórsetip, ózine qol jumsaý týraly qorqytýlar aıtqanyn rastady.

Sot is materıaldaryn zertteýge kóshedi

Sýdıa Samıddın Temiralıev aıyptaý tarapy men jábirlenýshi tarap shaqyrǵan kýágerlerden jaýap alý aıaqtalǵanyn habarlady.

Aıyptalýshynyń advokattary (protsess barysynda olardyń sany tórteýden úsheýge azaıǵan) Aımahannyń týystaryn – ata-anasy men basqa da jaqyndaryn sotqa shaqyryp, Nuraıdyń 2025 jylǵy qazanda olardyń úıinde bolǵany týraly jaýap berýin surady.

Sýdıa qorǵaý tarapy olardyń sot otyrysyna ózderi kelýin qamtamasyz ete alatynyn aıtty. Sonymen qatar Nuraıdy alyp ketý týraly alǵashqy aryz boıynsha protsessýaldyq sheshim qabyldaǵan tergeýshi men prokýror da shaqyrylýy múmkin.

Kýágerlerden jaýap alý aıaqtalǵan soń sot qylmystyq is materıaldary men júrgizilgen saraptamalardyń nátıjelerin zertteýge kóshti.

Kelesi sot otyrysy 4 tamyz kúni saǵat 10:00-ge belgilendi.

Qujattardy zertteý aıaqtalǵannan keıin taraptar sot jaryssózine daıyndyqty bastaıdy.

Eske salsaq, 31 shildede sotta Nuraı Serikbaıdy óltirý oqıǵasynyń negizgi kýágeri jáne onyń aǵalary jaýap bergen bolatyn.

Buǵan deıin sýdıa Sammıdın Temiralıev Sherhan Aımahannyń is boıynsha bergen aıǵaqtaryndaǵy qaıshylyqtarǵa nazar aýdarǵan edi. Advokat Aıanhan Omarov aıyptalýshynyń nusqasyna, saraptamalarǵa jáne dáleldemelerdi zertteýge qatysty birneshe ótinishhat bergen.

Eske salaıyq, 11 qańtarda Shymkentte 21 jastaǵy stýdent Nuraı Serikbaı qaza tapty.

Tergeý málimetinshe, aıyptalýshy qyzǵa 35 ret pyshaq jaraqatyn salǵan.

Tergeý barysynda kúdikti sot-psıhıatrııalyq saraptamadan ótken. Saraptama qorytyndysy boıynsha Sherhan Aımahan esi durys dep tanylǵan.

12 maýsymda tergeý aıaqtalyp, is Shymkent qalasynyń qylmystyq ister jónindegi mamandandyrylǵan aýdanaralyq sotyna joldanǵan.

Nuraı Serikbaıdyń ólimine qatysty alǵashqy aldyn ala tyńdaý aıyptalýshynyń aýyryp qalýyna baılanysty ótpegen.

23 shildede Aımahan sotqa tamaǵy tańylǵan kúıde arnaıy kúzetpen jetkizildi. Prokýror Madııar Ábilqasymov aıyptaý aktisin jarııalady.

Іs boıynsha alǵashqy kýágerler retinde Nuraı Serikbaıdyń ákesi men anasy jaýap bergen.

Aıyptalýshy Sherhan Aımahan qasaqana adam óltirdi degen aıypty moıyndamaı, marqumdy kinálap, óz áreketin affekt jaǵdaıynda jasaǵanyn málimdedi.