Túrmelerge qandaı tyıym salynǵan zattar jıi kirgiziledi
SQO qylmystyq-atqarý júıesi departamenti baspasóz qyzmetiniń málimetinshe, kolonııa aýmaǵyna sońǵy kirgizilmek bolǵan zattardyń biri – shaǵyn ǵana uıaly telefon. Ony №48 mekemeniń qyzmetkerleri rentgentelevızııalyq apparatty qoldana otyryp, aıaq kıim şetkasynyń ishinen taýyp aldy. Kúdik týdyrǵan «sálemdemeniń» ishinen SIM kartalary bar «Nokia» markaly uıaly telefon, sondaı-aq USB kabeli bar zarıadtaǵysh shyqty. Sottalǵanǵa tyıym salynǵan zatty Túrkistan oblysynan týysy jibergen eken.
«Mekeme aýmaǵyna túrli tásilmen ótkizbek bolady. Keń taraǵany aýmaqqa oralǵan zatty laqtyrý. Sondaı-aq qansha eskertsek te, týystary kezdesýge kelgende ózderimen ruqsat etilmegen zatty kirgizbek bolady. Poshta arqyly banderolmen, sálemdememen jiberetinder bar. Túrli tásilderdi qoldanyp, barynsha jasyrýǵa tyrysady. Bir jyldyń ishinde 89 uıaly telefondy aldyq, 76 gr esirtki zaty tárkilendi. Spırttik ishimdikterdi kirgizbek bolady. Zańdy buzǵandar ákimshilik jaýapkershilikke tartyldy», - deıdi SQO boıynsha QAJD rejim jáne qadaǵalaý bóliminiń aǵa jedel ýákili Dáýlet Imambaev.
Qylmystyq-atqarý júıesi departamentiniń qyzmetkerleri bir jyl ishinde túzetý mekemesine kirgizilmek bolǵan osyndaı zattardyń kórmesin uıymdastyrdy. Tek ótken jyldyń ózinde túrmege uıaly baılanys quraldaryn alyp kirýdiń 51 faktisi tirkelgen. Al jalpy 89 dana uıaly telefon tárkilengen. Al esirtkige qatysty 5 zańbuzýshylyq anyqtaldy. Sonyń birinde esirtki zaty jańǵaqtyń ishine jasyrylǵan.
Mamannyń aıtýynsha, túrme aýmaǵyna tyıym salynǵan zatty ótkizbek bolǵandarǵa 10 AEK mólsherinde aıyppul salynady. Qaıtalanǵan jaǵdaıda aıyppul mólsheri eki ese artady. «Kelip túsken barlyq sálemdemeler jiti qaralady, qyzmetkerler ár zatty jeke-jeke tekseredi. Sondaı-aq ıis alatyn ıtterimiz de bar. Ótken jyldyń qorytyndysy boıynsha 14 adam ákimshilik jaýapkershilikke tartyldy. 2 aıyppul salynyp, 12 eskertý jasaldy. Qazirgi ýaqytta barlyq mekemelerge zamanaýı rentgen-televızııalyq qondyrǵylar ornatylyp jatyr. Bul bizdiń jumysymyzdy jeńildete túspek», - deıdi Dáýlet Imambaev.
Foto: SQO qylmystyq-atqarý júıesi departamenti