Túrmelerde jańa jumys oryndaryn ashý úshin jeke bıznesti tartý qajet - J.Keshýbaev

ASTANA. QazAqparat - Túrmelerde jańa jumys oryndaryn ashý úshin jeke bıznesti tartý qajet. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR ІІM Qylmystyq-atqarý júıesi komıteti tóraǵasynyń orynbasary Janat Keshýbaev aıtty.

«Bizdiń kelesi - jańa jumys oryndaryn ashý úshin kolonııalarǵa jeke bıznesti tartý. Eger jaıly jaǵdaı jasar bolsaq, onda bıznes ınfraqurylymǵa qarjy quıyp, jańa nysandar salady, zamanaýı qural-jabdyqtar ornatatyn bolady», - dedi ol.

Onyń aıtýynsha, túrmedegi jumys sottalýshylardy durys jolǵa qoıýdyń bir joly. Sondyqtan da bul iske sottalýshylar tarabynan zor qyzyǵýshylyq bolady.

«Osy maqsatta Sottalýshylarǵa arnalǵan 100 is» atty kitap ázirlendi. Onda árbir iske 2,3 bet arnalyp, bıznes júrgizýdiń qyr-syry, ózekti máseleleri men qupııalary jan-jaqty jazylǵan», - dedi J.Keshýbaev.

Sonymen qatar qandaı da bir ispen aınalysqysy kelgen sottalýshylarǵa arnalǵan arnaıy aqparattyq baza ázirlenbek. Onda 1000 bıznes ıdeıa tizimi, burynǵy sottalǵandardyń tabysqa jetý tarıhy, memlekettik qoldaý tetikteri syndy bólimder bar.