Túrmelerde óndiris oryndary ashylmaq - ShQO

ÓSKEMEN. QazAqparat – Shyǵys Qazaqstan oblysynda sottalǵandardy jumyspen qamtý úshin kásipkerlerge túzetý mekemelerinde óndiris oryndaryn ashý usynyldy, dep habarlaıdy QazAqparat tilshisi.

ShQO QAJ departamenti baspasóz qyzmetiniń málimetine súıensek, sottalǵandardy jumyspen qamtamasyz etý kórsetkishin arttyrý, jeke kásipkerlerdi tartý máseleleri boıynsha OV-156/21 mekemesinde semınar ótti. Oǵan Jarma aýdandyq Atameken kásipkerler palatasynyń basshysy Dastan Muhaev, shaǵyn jáne orta kásipkerler, «Eńbek-Óskemen» federaldy respýblıkalyq memlekettik kásipornynyń ókili Asqar Smaǵulov qatysty. Olar túzetý mekemesi aýmaǵynda óndiris ashý úshin qandaı jaǵdaılar qarastyrylǵanyn kórdi.

«Qylmystyq-atqarý júıesi mekemelerinde óz kásibin ashyp tabys tabýǵa umtylatyn barlyq kásipkerler úshin birshama múmkindik kózdelgen. Birinshiden, keıinnen óteý quqyǵynsyz senimgerlikpen basqarý shartyn jasasý arqyly óndiristi jalǵa berý múmkindigi bar. ıAǵnı, jeke kásipkerler elektr qýaty men kommýnaldyq qyzmetter úshin tólem jasaı otyryp, senimgerlikpen óndiris asha alady. Ákimshilik óz kezeginde jumys kúshimen qamtamasyz etýdi, beınebaqylaýdy, óndiristegi ónim men jabdyqtardyń qorǵalýyn qamtamasyz etedi», - deıdi OV-156/21 mekemesi basshysynyń orynbasary Anara Sábıeva.

Sottalǵandardyń ortasha jalaqysy 42 500 teńgeni quraıdy. Jeke kásipker Jasulan Ýahanovtyń aıtýynsha, bul ádis bıznes ókilderi úshin de mol tabys ákelmek.

«Men birneshe jyldan beri túzetý mekemesinde kásippen aınalysamyn. Baıqaýymsha, bul jer óte qolaıly. Kolonııadaǵy qyz-kelinshekter óz jumystaryna jaýapty qaraıdy jáne gıgıena men tazalyq standarttarynyń barlyq talaptaryn saqtaıdy», - deıdi ol.

Osylaısha, kásipker túrli ónimderdi tómen baǵada alsa, sottalǵandar jumyspen qamtylyp, aqsha tabady. Sondaı-aq jazasyn ótep jatqandar oń minezdeme alyp, bostandyqqa shyqqannan keıin de qoǵamǵa tez beıimdelip ketedi.