Túrmelerde qyzmet etetin ımamdarǵa jalaqy taǵaıyndaý usynyldy
«QMDB óziniń kúndelikti san-salaly qyzmeti barysynda basty 4 baǵyt boıynsha jumysynyń biri retinde destrýktıvti aǵymdaǵy azamattarǵa túsindirý jumystaryn júrgizedi. Ońaltý jumystaryna qatysty taǵy bir tásil – tarıhpen tárbıeleý. Tarıh degenimiz adamzattyń qoǵamdyq jady, ózin-ózin tanýy, ótken ómirdiń sanada jańǵyrýy. Ǵulamalar «Adam rýhy oıatqyń kelse, onyń tarıhyn oıat» deıdi. Dinı basqarma «Din jáne tarıhı taǵylym» ıgi bastamasyn odan ary jandandyryp, jamaǵatty tarıhtan alar sabaqtarmen sýsyndatyp, salt pen tarıhı sanaǵa, ádet pen ǵurypqa shekeden qarap, teris kózqarasqa aldanǵan dinı aǵymdar úshin arnaıy jobany qolǵa aldy. Maqsatymyz – destrýktıvti dinı aǵymdardyń tarıhı ári kıeli jerlerge de saparlaryn uıymdastyryp, tarıhı sanasyn jańǵyrtý», - dedi Bas múftı Serikbaı qajy Oraz Qazaqstan Dintanýshylarynyń HІ forýmynda.
Onyń aıtýynsha, saltty saqtaýp, dástúrli dinniń qundylyqtardy dáripteý kerek.
«Osy rette birneshe usynysty ortaǵa salaıyn: birinshiden, «Tarıh jáne dinı sana» jobasyn birlesip, júzege asyrýdy usynamyn. Tarıhı nysandar men oryndarǵa jasalatyn josparly sapar jamaǵattyń tanymyn, kókjıegin keńeıtip, ıntellektýaldyq deńgeıin arttyrady. Bul rette syrtqy elderdiń de tájirıbesin de alýǵa bolady. Ekinshiden, qoǵamnyń aǵartýshy tobyna jatatyn ımamdardyń tynymsyz qyzmetin eskerip, olarǵa da áleýmettik turǵydan qoldaý jasalsa degen usynysymyz bar. Ásirese, 100-ge jýyq elimizdegi túzeý mekemelerinde jumys jasaıtyn din qyzmetkerlerine turaqty jalaqy taǵaıyndalsa deımiz. Bul din qyzmetkerine kórsetilgen qurmet pen ádil baǵa bolar edi», - dedi ol.
Bas múftı sonymen qatar, Aqsaqaldar ınstıtýtynyń rólin kúsheıtý máselesin kóterdi.
«Óıtkeni, biz qarııanyń sózine qarsy shyqpaǵan halyqpyz. Bul sanaǵa sińgen saltymyz. «Qoı» deıtin qoja bola bilgen qanshama qarııalarymyz jat aǵymǵa ketken jastarǵa nasıhatyn aıtyp, tárbıesin túzep keledi. Osy baǵytta oblystyq meshit janyndaǵy Aqsaqaldar alqasy men aýdan, aýyldardaǵy Bıler keńesi úlken qural bola alady dep oılaımyn», - dedi ol.
Eske sala ketsek, elordada búgin Qazaqstan Dintanýshylarynyń HІ forýmy ótip jatyr.
