Túrmelerde koronavırýstyń jańa tolqynyna daıyndyq qalaı júrgizilýde
NUR-SULTAN. QazAqparat - QR Іshki ister mınıstrligi Qylmystyq atqarý júıesi komıtetiniń tóraǵasy Janat Eshmaǵambetov elimizdiń túzeý mekemelerinde koronavırýstyń jańa tolqynyna daıyndyq qalaı júrgizilip jatqanyn aıtty, dep habarlaıdy QazAqparat tilshisi.
«Tótenshe jaǵdaı rejımi jarııalanǵan sátten-aq aldymyzda qylmystyq atqarý júıesiniń jabyq mekemelerinde indettiń taralýyna jol bermeý mindeti ótkir turdy. Biz jergilikti atqarýshy organdarmen, azamattyq densaýlyq saqtaý organdarymen birlesip, jedel túrde tıisti jospar ázirledik. Árbir mekeme azamattyq beıindegi medıtsınalyq uıymdarǵa bekitildi. Túzeý mekemeleri aýmaǵynda provızorlyq jáne ınfektsııalyq statsıonarlar ashylyp, aýqymdy karantın sharalary ótkizildi. Zalasyzdandyrý sharalary qarqyndy engizilip, antıseptık quraldarmen ǵımaratty tazalaý júrgizildi. Keıbir mekemelerdi kazarmalyq jaǵdaıǵa kóshirgen jaıt ta oryn aldy», - dedi komıtet tóraǵasy Іshki ister mınıstrligi alańynda ótken baspasóz máslıhatynda.
Onyń aıtýynsha, qyzmetkerler ınfektsııanyń taralýyna jol bermeý úshin vahtalyq ádispen táýliktep mekeme aýmaǵynan shyqqan joq. Sonyń arqasynda jaǵdaı turaqtalyp, sottalýshylardyń jappaı aýrýyna jol berilmedi.
«Qazirgi ýaqytta koronavırýstyń jańa tolqynynyń kútilýin eskere otyryp, dárilik zattardyń qajetti qory, medıtsınalyq qural-jabdyqtar satyp alyndy. Medıtsınalyq kadrlardy da jınaqtap otyrmyz. Olardyń jalaqylaryn jáne eńbek jaǵdaılar kóterý máselesi sheshilýde. Qabyldanǵan sharalardyń arasynda biz sanıtarlyq-epıdemıologııalyq jaǵdaıdy baqylaýda ustap tura alamyz», - dedi Janat Eshmaǵambetov.
