Túrmege tyıym salynǵan zattardy alyp ótpek bolǵan mysyq quryqtaldy
ASTANA. 8 qańtar. QazAqparat - Brazılııadaǵy abaqtylardyń birinde qaraýylshylar sottalǵandarǵa kontrabanda tasymaldamaq bolǵan mysyqty ustady.
ITAR-TASS málimetterine qaraǵanda, oqıǵa Jańa jyl merekesi kúnderi oryn aldy.
Atap aıtqanda, túzetý mekemesiniń aýmaǵyna tyıym salynǵan zattardy jetkizý úshin janýardy paıdalaný áreketi iske aspady. Mysyqqa artylǵan «júkti» túrmeniń bas qaqpasynyń aldyndaǵy qaraýylshylar baıqap qalǵan kórinedi. «Quryqtalǵan» mysyqtyń arqasyna burǵylar men egeýler, zarıadtaǵysh qurylǵysymen jabdyqtalǵan uıaly telefon jáne basqa da zattar skochpen baılanǵan. Belgili bolǵandaı, bul zattar Arapırak qalasynyń abaqtysynan qashýǵa bel býǵandardyń daıyndyǵyna arnalǵan. Ustalǵan mysyqtaǵy zattardyń barlyǵy tárkilendi, al janýar jergilikti veterınarlyq ortalyqqa jetkizildi. Qazirgi kezde tergeý amaldary júrgizilýde. Bul turǵyda túrmeniń barlyq 263 sottalýshysy kúdikti retinde qarastyrylýda.
