Túrmege 10 keli marıhýana tasý áreketiniń joly kesildi
ASTANA. 4 sáýir. QazAqparat /Ǵalymjan Hasenov/ - Qylmystyq-atqarý júıesi qyzmetkerleri qyraǵylyǵynyń arqasynda, 3 sáýir kúni Qaraǵandy oblysyndaǵy túzetý mekemesiniń aýmaǵyna 10 kelideı marıhýana jetkizý áreketiniń joly kesildi.
Bul týraly penıtentsıarlyq júıeniń baspasóz qyzmetinen habarlady.
Túrme qyzmetkerleri ishki ásker qyzmetkerlerimen birlesip, esirtki tasymaldaýshyny ustady. Qaraǵandy oblysynyń turǵyny, 35 jastaǵy azamatty tintý kezinde ishine esirtki zaty salynǵan úsh túıinshek tárkilendi.
Osynyń aldynda Pavlodardaǵy qatar rejımdegi kolonııada da esirtki tasý áreketiniń joly kesildi. Sottalýshyǵa jiberilgen sálemdemedegi karamel kámpıtterdiń ishinen polıetılen kapsýlalaryna salynǵan geroın zaty tárkilendi. Al Qaraǵandy oblysynyń Kóksý kentindegi áıelder kolonııasynda sottalýshyǵa ákelingen sálem-saýqattaǵy kók pııazdyń ishinen 100 gramdaı geroın salynǵan úsh túıinshek tabylǵan
Atalǵan faktiler boıynsha tergeý amaldary júrip jatyr.
2011 jyldyń birinshi toqsanynda rejımdik nysandarǵa esirtki zattaryn tasý áreketiniń 79 faktiniń joly kesildi, dep habarlady Qylmystyq-atqarý júıesi komıtetinen.
