Túrmeden shyqqandarǵa «Qaqpa aldyndaǵy kezdesý» jobasy kómektesti

Sottalǵandar jazasyn ótep shyqqan soń qaıda barady? Bul suraqtyń jaýaby túrme ishinde qoıyldy. Búgin Aqtóbe oblysy boıynsha Qylmystyq atqarý júıesi departamenti men KA-168/2 túzeý mekemesi qaýipsizdigi ortasha sottalǵandarmen kezdesý ótkizdi. Túzetý mekemesinde «Qaqpa aldynda kezdesý» jobasy qolǵa alyndy.

«Qaqpa aldynda kezdesý» jobasynyń maqsaty - sottalǵandardy áleýmettik beıimdeý, qylmystyń qaıtalanýyn aldyn alý. Túzetý mekemesinen shyqqan adamdardyń problemalaryn anyqtaý jáne sheshý jobasyna jergilikti atqarýshy organdar jáne qoǵamdyq uıymdar qatysty. Joba aıasynda áleýmettik baılanystardy ornatý, kásibı bilim alý, biliktiligin arttyrý, jumyspen qamtý, kepildi medıtsınalyq kómegin alý, quqyqtyq kómek, qujattaryn qaıta qalpyna keltirý iske asyrylyp jatyr»,- dedi KA 168/2 túzetý mekemesiniń bólim bastyǵy Baǵdat Ismaılov.

Esirtki zattaryn zańsyz saqtaǵany úshin 3 jylǵa bas bostandyǵynan aıyrylyp, jazasyn ótegen A. Saǵynbekov búgin túzetý mekemesinen shyqty. Ol aldymen jan-jaqty aqparattandyrylyp, densaýlyǵyn teksertip aldy.
 

«Qaqpa aldyndaǵy kezdesý» óte jaqsy uıymdastyrylǵan. Al Probatsııa úıinde áleýmettik jaǵdaıym anyqtalyp, medıtsınalyq tekserýden óttim. Mamandar  biliktilikti arttyrý, jumysqa ornalasý baǵdarlamalary boıynsha túsindirý jumysyn júrgizdi. Shynymdy aıtsam, mundaı kómekti kútpedim. Barlyǵyna rahmet aıtamyn. Bul jerge qaıta oralǵym kelmeıdi»,- dedi A.Saǵynbekov.

Aıta keteıik, Aqtóbe qalasynda «Probatsııa úıi» jumys istep tur. Munda quqyq qorǵaý organdarynda esepte turǵan adamdarǵa áleýmettik-quqyqtyq kómek kórsetiledi. Probatsııa úıinde Aqtóbe qalasynyń jumyspen qamtý jáne áleýmettik baǵdarlamalar bóliminiń, oblystyq Ádilet departamentiniń, bilim berý, densaýlyq saqtaý basqarmalarynyń, Aqtóbe qalasynyń áleýmettik beıimdelý ortalyǵynyń, prokýratýranyń qyzmetkerleri turaqty jumys isteıdi.