Túrmeden shyqqan pedofıldiń burynǵy qylmysqa qaıtyp barmaıtynyna eshkim kepildik bermeıdi - Bas prokýratrýa

ASTANA. QazAqparat - QR Bas prokýrorynyń orynbasary Andreı Kravchenkonyń aıtýynsha, qazir túrmede jynystyq qylmys úshin sottalǵan bir myńnan astam adam otyr. Alaıda olardyń bostandyqqa shyqqannan keıin burynǵy qylmysqa qaıtyp barmaıtynyna eshkim kepildik bere almaıdy, dep xabarlaıdy QazAqparat.

A.Kravchenkonyń aıtýynsha, prokýrorlar álemdik tájirıbeni, sondaı-aq osy saladaǵy ǵylymı zertteýlerdi zerdelep shyqty. Sóıtse, búginde seksýaldyq qylmystarmen kúresýdiń ámbebap júıesi joq. Atalǵan problema tolyǵymen zerttelmegen. Degenmen, pedofıldik áreketti aldyn alýdyń eki joly bar. Birinshiden, qylmyskerdiń áreketin aldyn ala boljap otyrýǵa bolady. Alaıda ol úshin úlken áleýmettik-psıxologııalyq daıyndyq qajet. Al ekinshi ádiske sáıkes, balanyń qaýipsizdik sharalaryna basa nazar aýdarǵan jón. Biraq atalǵan ádistiń ekeýin de iske asyrý úshin barlyq adamdardyń qoǵam bolyp atsalysqany qajet.

"Biz árbir qylmysty jan-jaqty zerdelep shyqtyq. Sóıtip, jynystyq qylmystarmen kúresýdiń negizgi máselelerin anyqtadyq. Birinshiden, jynystyq qylmystar úshin sottalǵandarmen jumys isteý kerek. Qazirgi kezde ondaı adamdardyń psıxologııalyq portreti jasalmaıdy. Biz olardyń qylmysqa ne sebepti barǵanyn, qandaı psıxologııalyq aqaýlyqtyń bolǵanyn da bilmeımiz. Shetelde pedofılderdi jan-jaqty zerttep, jasaǵan qylmysqa qaıtyp bara ma, joq pa, osy másele tereń zerdeleıdi. Qazirgi kezde Qazaqstan túrmelerinde adam zorlaǵan 1229  qylmysker otyr. Búgin be, erteń be, olar bostandyqqa shyǵady. Biraq olarmen eshqandaı profılaktıkalyq jumys júrgizilmeıdi", - dedi A.Kravchenko búgin Bas prokýratýrada ótken jıynda.

Osyǵan baılanysty prokýrorlar jynystyq qylmys jasaǵan azamattardy arnaıy psıxologııalyq tekseristen ótkizip, tıisti emdeý sharalaryn uıymdastyrýdy usynyp otyr. Al dárigerlerdiń keńesteri negizinde qylmyskerdiń jazany óteý merzimin qarastyrý qajet.