Túrmeden shyqqandaı boldym: ırandyqtar ınternettiń qaıta qosylǵanyn osylaı jetkizdi
ASTANA. KAZINFORM – Iranda ınternetke qoıylǵan shekteýlerdiń alynýy turǵyndar arasynda zor qýanysh týdyrdy. Keıbir ırandyqtar bul sátti uzaq ýaqyt túrmede otyryp, bostandyqqa shyqqandaǵy sezimmen salystyrdy.
– 88 kúnnen keıin ózimdi úsh aı túrmede otyryp, alǵash ret aspandy kórgen adamdaı sezindim, – dedi ırandyq turǵyndardyń biri BBC-diń Middle East Daily baǵdarlamasyna bergen suhbatynda.
Onyń aıtýynsha, ınternet qaıta qosylǵannan keıin saıttardyń ashyla bastaǵanyn kórgende erekshe qýanyshqa bólengen.
– Senbeıtin shyǵarsyz, biraq saıttyń ashylǵanyn kórgende qýanyshtan ushyp keterdeı boldym. Al Telegram, WhatsApp jáne basqa da qosymshalar arqyly qaıtadan habarlama jibere alatynymdy túsingende, bul múlde erekshe sezim boldy. Qazir osyny aıtyp otyrǵanda da kózime qýanyshtan jas kelip tur, – dedi ol.
Onyń aıtýynsha, telefonyna kelgen alǵashqy habarlamalardyń biri jańartýdy qajet etetin qosymshalardyń uzyn tizimi bolǵan. Bul da oǵan erekshe áser qaldyrǵan.
Iranda ınternet baılanysynyń ishinara qalpyna keltirilýi halyq arasynda jeńildik sezimin týdyrǵanymen, eldegi tsenzýranyń kúsheıýine qatysty alańdaýshylyq ta saqtalyp otyr. Sebebi buǵan deıin de Iranda ınternetke qoljetimdilik qatań baqylaýda bolǵan.
Eske salsaq, 28 aqpanda AQSh pen Izraıl Iranǵa qarsy soǵys bastaǵannan keıin el bıligi ınternetti óshirip tastady. Resmı tulǵalardyń málimdeýinshe, bul shara baqylaý júrgizý, tyńshylyq áreketteri men kıbershabýyldardyń aldyn alý maqsatynda qabyldanǵan.
