Túrmeden shyǵaryp berem: Astanada 57 mln teńgeden astam aqsha alǵan alaıaqqa sot úkimi shyqty
ASTANA. KAZINFORM — Astanada tanysyn qylmystyq jaýaptylyqtan bosatýǵa kómektesemin dep 27 mln teńge men 30 myń dollar alǵan er adam 6 jyl 10 aıǵa sottaldy. Sottalýshy aqshany ıemdengeni úshin kináli dep tanyldy. Bul týraly Astana qalasynyń qylmystyq ister jónindegi aýdanaralyq soty málim etti.
Sot materıaldaryna sáıkes, buǵan deıin birneshe ret alaıaqtyq jasaǵany úshin sottalǵan A. esimdi azamat D.-ǵa qatysty qylmystyq istiń tergelip jatqanyn bilgen. Sondaı-aq onyń týystary istiń oń sheshilýine múddeli ekenin ańǵarǵan.
Osy jaǵdaıdy paıdalanǵan ol jábirlenýshi G.-nyń aqshasyn ıemdenýdi josparlaǵan. 2023 jylǵy qańtarda ortaq tanysy arqyly G.-men kezdesip, óziniń baılanystary bar ekenin jáne qylmystyq istiń barysyna yqpal ete alatynyn aıtqan. D.-ny qylmystyq jaýaptylyqtan bosatýǵa kómektesetinin aıtyp, qyzmeti úshin 27 mln teńge talap etken.
Ýádesine sengen G. 2023 jylǵy 20 qańtarda deldal arqyly A.-ǵa atalǵan somany bergen.
Alaıda D. keıin 2 jyl 6 aıǵa bas bostandyǵynan aıyrylǵan. Osydan soń A. jábirlenýshige taǵy da habarlasyp, apellıatsııalyq satyda D.-ny aqtap alýǵa kómektese alatynyn aıtqan. Bul joly ol 30 myń AQSh dollaryn talap etken.
Nátıjesinde G. 2023 jylǵy 10 qyrkúıekte 20 myń dollar, al 24 qyrkúıekte qalǵan 10 myń dollardy bergen.
Osylaısha, A. jábirlenýshiniń 27 mln teńgesi men 30 myń dollaryn ıemdenip, oǵan asa iri mólsherde materıaldyq zalal keltirgen. Keıin jábirlenýshige 39 mln 132 myń 900 teńge qaıtarylǵan.
Sot qandaı sheshim shyǵardy?
Sot otyrysynda prokýror A.-ny 8 jylǵa bas bostandyǵynan aıyrýdy surady. Al sottalýshy óz kinásin moıyndamaı, ózin aqtaýdy talap etti.
Qylmystyq kodekstiń 190-baby 4-bóliginiń 2) tarmaǵynda mundaı qylmys úshin 5 jyldan 10 jylǵa deıin bas bostandyǵynan aıyrý jazasy qarastyrylǵan.
Sot jazany jeńildetetin mán-jaılar retinde sottalýshynyń asyraýynda kámeletke tolmaǵan balalary bar ekenin jáne keltirilgen zalaldy ishinara ótegenin eskerdi. Al qylmystyń qaıtalanýy jazany aýyrlatatyn mán-jaı dep tanyldy.
Іstiń mán-jaıyn, qylmystyń sıpaty men aýyrlyǵyn, sondaı-aq jábirlenýshiniń pikirin eskere otyryp, sot A.-ǵa Qylmystyq kodekstiń 60-baby boıynsha túpkilikti 6 jyl 10 aı merzimge bas bostandyǵynan aıyrý jazasyn taǵaıyndady.
Jábirlenýshiniń azamattyq talaby qanaǵattandyryldy.
Sot úkimi ázirge zańdy kúshine engen joq.
