Túrmeden merziminen buryn bosatý máselesi alqabılerdiń qatysýymen qaralýy múmkin
ASTANA. KAZINFORM — Joǵarǵy Sot shartty túrde merziminen buryn bosatý jáne jazany aýystyrý máselelerin talqylady. Bul týraly vedomstvonyń baspasóz qyzmeti habarlady.
Joǵarǵy Sottyń qylmystyq ister jónindegi sot alqasynyń tóraǵasy Nazgúl Rahmetýllına qylmystyq jáne qylmystyq-protsestik zańnamasyn jetildirý, atap aıtqanda, asa aýyr jáne basqa da keıbir qylmystar úshin sottalǵandardyń shartty túrde merziminen buryn bosatý jáne jazany aýystyrý týraly ótinishhattaryn qaraýdy alqabılerdiń qatysýymen ótetin sotqa berý boıynsha pılottyq jobany engizý máselelerin talqylaýǵa arnalǵan dóńgelek ústel ótkizdi.
Іs-sharaǵa sýdıalar, Parlament Májilisiniń depýtattary, ǵylym salasynyń sarapshylary, quqyq qorǵaý organdarynyń jáne Respýblıkalyq advokattar alqasynyń ókilderi qatysty.
N.Rahmetýllına Joǵarǵy Sot bul saladaǵy sot praktıkasyn birizdilendirý boıynsha aýqymdy jumys atqarǵanyn atap ótti.
— Osylaısha, 2025 jyly 2024 jylmen salystyrǵanda jazany aýystyrý týraly qanaǵattandyrylǵan ótinishhattardyń úlesi 8%-ǵa (30,9%-dan 38,9%-ǵa deıin), al shartty túrde merziminen buryn bosatý týraly ótinishhattardyń úlesi 1%-ǵa (52,9%-dan 53,9%-ǵa deıin) ósti, al aldyńǵy jyldary bul kórsetkishter únemi tómendegen. Degenmen, bul máselelerdiń qoǵam úshin sezimtaldyǵyn eskere otyryp, odan ári jańǵyrtý qajettiligi atap ótildi. Bul máselelerdiń gýmanıstik sıpatyn qaıta qaraý emes, kerisinshe, naqtylyqqa, ashyqtyqqa jáne qoǵamnyń qatysýyna basa nazar aýdara otyryp, protsedýralyq nysandardy ázirleý, — delingen habarlamada.
Talqylaý barysynda sarapshylar usynylǵan jobaǵa qatysty ártúrli pikirlerin bildirdi. Keıbireýler ony iske asyrýdyń obektıvti qajettiliginiń joqtyǵyn atap ótip, praktıkalar men qoldanystaǵy protsedýralyq tetikterdi birizdilendirý boıynsha júrgizilgen jumystarǵa nazar aýdardy.
Sonymen qatar, basqalary bul ınstıtýtty odan ári jańartý jáne jańǵyrtý ıdeıasyn qoldady, shartty túrde merziminen buryn bosatý jáne jazany aýystyrý máseleleri mańyzdy qoǵamdyq múddelerge áser etetinin jáne sot sheshimderine ashyqtyq pen senimdi arttyrýdy talap etetinin atap ótti. Naqty jáne mazmundy talqylaý ótti, onyń nátıjeleri boıynsha osy saladaǵy quqyqtyq retteýdi jetildirý jóninde usynystar daıyndalatyn bolady.
Osydan buryn Atyraý qalasynda erlerge arnalǵan túrme órtengenin jazǵanbyz.
