Túrmeden keıingi ómir: Adasqannyń aıyby joq
ASTANA. QazAqparat - Astanada sottalǵan taǵdyrlar týraly syr shertetin «Óz bostandyǵyńa qol jetkiz» fotokórmesi uıymdastyryldy, dep habarlaıdy QazAqparat tilshisi.
Kórmeni Bas prokýratýra men EO Qazaqstandaǵy qylmystyq ádil sotty jetildirý jobasy (EUCJ) birlese uıymdastyrǵan jáne onda probatsııa qyzmeti arqyly úlgili tártibimen, adal eńbegimen bostandyqqa shyǵyp, qoǵamǵa beıimdele bilgen sottalýshylar týraly baıandalady.
«Fotokórme keıipkerlerin túsirý úshin Oral, Semeı, Qaraǵandy qalalaryna sapar shektik. Onda bir kezderi shalys basyp, biraq óz qateligin moıyndap, memlekettiń qoldaýymen ómirlerin jańa paraqtan bastaǵan úsh taǵdyr ıesin kórsettik. Olardyń qalaı eńbek etkenin, túrmeden keıingi ómiriniń qalaı ótip jatqanyn jazdyq. Mundaǵy bizdiń maqsatymyz sottalǵandar týraly qoǵamda qalyptasqan qasań stereotıpterdi buzý edi. Olar da siz ben biz sekildi qoǵamnyń tolyqqandy músheleri. Eń bastysy, qoǵamnyń olardy qabyldap, túzelip ketetine senýi qajet», - dedi fotojoba avtorlarynyń biri, jýrnalıst Ksenııa Prıdatchenko.
Joba keıipkerleriniń biri - Semeı qalasynyń turǵyny, kóp balaly ana Anar Súleımenova. Ol alaıaqtyq úshin bas bostandyǵynan aıyrylyp, altynshy balasyn kolonııada ómirge ákelgen. Túrmedegi eńbek jolyn Shamalǵan aýylynda áıelder kolonııasy janyndaǵy Balalar úıinde bala baǵýshy bolyp bastaǵan jáne qazir Anar probatsııa qyzmetiniń kúsh salýymen aspaz-kondıter kýrstaryna qatysyp júr.
Oral qalasynyń 33 jasar turǵyny Qazybek Nurtazın bir kezderi tonaý, qorqytyp alý jáne adam urlaý baptarymen sottalǵan edi. Kolonııada ótken eki jyl ishinde Qazybek keramzıt bloktaryn, saqınalar men metall konstrýktsııalaryn óndirý boıynsha bıznes ashqan. Óz kásipornyna jıyrmadan astam adamdy jumysqa alǵan. Qazir úı salyp, avtobýstar men KamAZ kólikterin jalǵa berýmen aınalysady.
Qaraǵandylyq Aleksandr Nekrasov bolsa uıymdasqan qaraqshylyq úshin temir torǵa jabylǵan. Kolonııada aǵash ustasynyń kómekshisi bolyp jumys istep, dánekerleý kásibiniń qyr-syryn meńgergen. Probatsııa qyzmeti arqyly gaz-elektr dánekerleýshi mamandyǵy boıynsha qysqa merzimdi kýrstardy aıaqtaǵan. Qazir «Aspap» kooperatıvinde jumys isteıdi.
Fotokórme Qazaq gýmanıtarlyq zań ýnıversıtetine qoıylǵan jáne 16 jeltoqsanǵa deıin jalǵasady.
