Túrmeden qashqan qostanaılyq mektep aýlasynda ustaldy
QOSTANAI. QazAqparat - Rýdnyı qalasynyń polıtsııasy túrme kolonııasynan qashyp ketken qylmyskerdi ustady, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.
Rýdnyı qalasynda ýchaskelik ınspektor Qasymbek Qarjaýbaev «102» kezekshi ınspektorynan mektep-gımnazııa aýmaǵynda bógde er adamnyń ishke enýge tyrysqany týraly habarlama alǵan.
«Oqıǵa ornyna kelgen polıtsııa maıory mas kúıinde bolǵan kúdikti er adamdy baıqaıdy. Qolyna kirpish ustaǵan kúdikti oqý ornyna kirmek bolady. Tipti, polıtsııa qyzmetkerine oǵan áldekimder shabýyl jasap, urǵanyn aıtqan. Alaıda, tájirıbeli maıor onyń bul aldaýyna túspedi», - deıdi Rýdnyı polıtsııa basqarmasynyń resmı ókili Іlııas Qudabaev.
Qasymbek Qarjaýbaev onyń túrme kolonııasynan qashyp ketken qylmysker ekenin birden baıqaǵan. Ol tártip saqshysyna qarsylyq kórsetken. Áldeneshe ýaqyttan soń oqıǵa ornyna ýcheskelik ınspektor Oleg Raşýpkın keldi. Osylaısha, qonys kolonııasynan qashqan 33 jastaǵy er adam qolǵa tústi. Qazirgi ýaqytta qylmysker merzimdi óteý ornyna jetkizildi.
Eske salsaq, polıtsııa qonys kolonııasynan qashyp ketken Arman Jumanovqa izdeý salǵan bolatyn.
