Túrmedegilerdiń sanyn azaıtý: Qazaqstan bul kórsetkishke qalaı qol jetkizdi

ASTANA. QazAqparat - Táýelsizdik alǵan jyldary túrmede otyrǵan adamdardyń sany jaǵynan úshinshi orynda turǵan Qazaqstan birshama qadamdardyń arqasynda halyqaralyq deńgeıde kórsetkishin jaqsartqan. Bul jaıly Astanada ótip jatqan «Qazaqstandaǵy qylmystyq sot tóreliginiń bolashaǵy: Іzgilendirýden ózgeristerdi basqarýǵa ótý» atty halyqaralyq konferentsııa barysynda Qazaqstan Respýblıkasy Bas prokýrorynyń orynbasary Marat Ahmetjanov aıtyp berdi, dep habarlaıdy QazAqparat tilshisi.

«Eýropalyq odaqtyń úshjyldyq «Qazaqstandaǵy qylmystyq sot tóreligin jetildirý» (EUCJ) jobasy bizge qalaı kómektesti? Eń aldymen, bul joba álemdik tájirıbelerdi ala bilýge, álemdik deńgeıdegi sarapshylardy tartýǵa múmkindik berdi. Quqyq qorǵaý organdarynyń materıaldyq-tehnıkalyq qamtamasyz etilýin zerttedik. Eýropalyq odaq Qazaqstanda bola otyryp, óziniń mańyzdy mıssııasyn oryndap otyrǵany qýantady», - dedi Marat Ahmetjanov.

Bas prokýrordyń orynbasary joba aıasyndaǵy mańyzdy jumystardyń birine toqtala ketti.

«Qazaqstan táýelsizdik alǵan ýaqytta túrmedegi adamdardyń sany jaǵynan úshinshi orynda turǵan edik. Egemendik alǵan jyldary bizdiń túrmelerde 100 myń tarta adam otyrǵan. Aldymyzda osy máseleni sheshý jumysy turdy. Esepteı berińiz, sol tusta Qazaqstandaǵy árbir jeti otbasynyń bir múshesi túrmede jazasyn ótegen. Bul rette - «Túrmedegilerdiń sanyn azaıtýdyń 10 sharasy» bizge úlken kómek boldy. Osynyń arqasynda túrmedegilerdiń sany 32 myńǵa deıin azaıdy. Túrmedegilerdiń sany jaǵynan halyqaralyq ındekste Qazaqstan 35-shi orynnan 82-i orynǵa kóterildi. 8 kolonııa jabyldy. 12 mlrd teńge únemdelip, ol qarajat áleýmettik qajettiligi bar ózge salalarǵa jumsaldy», - deıdi Bas prokýrordyń orynbasary.

Marat Ahmetjanovtyń aıtýynsha, «Túrmedegilerdiń sanyn azaıtýdyń 10 sharasy» jobasy 2017 jyly aıaqtalǵan.

«Osy jyly izgilendirý týraly zańnyń qabyldanýymen tórt myńǵa tarta túrmede otyrǵan adam bostandyqqa shyqty. Keıbir adamdar zańnamalyq turǵydan izgilendirý zańyna kúdikpen qaraǵan edi. Biraq, men onyń kontseptsııasyna taǵy da erekshe mán bere ketkim keledi: eń aldymen bizdiń qoǵamǵa qaýip týdyrmaıtyn adamdar ǵana bostandyqqa shyǵarylýy kerek. Memleket basshysy «reformalar qoǵamdaǵy azamattardyń quqyqtaryna qaıshy kelmeýi kerektigin» qatań eskertken bolatyn. Mine, sondyqtan, kisi óltirgender, tonaýshylar, alaıaqtar men zorlaýshylar túrmede qala beredi. Biraq, qalǵanyn biz qoǵamnyń tolyqqandy azamattaryna qaıtadan aınaldyrýymyz kerek», - dedi Marat Ahmetjanov.

Eske sala ketsek, atalmysh halyqaralyq konferentsııa Eýropalyq odaqtyń úshjyldyq «Qazaqstandaǵy qylmystyq sot tóreligin jetildirý» jobasynyń qorytyndysyna arnalyp otyr (EUCJ).