Túrmedegiler áskerı kıim úlgilerin tige bastaıdy
ASTANA. QazAqparat - Túrmedegi kásiporyndar qorǵanys salasynyń memlekettik tapsyrysyn oryndaıtyn bolady. Búgin Májiliste Qylmystyq-atqarý júıesindegi máselelerge arnalǵan Úkimet saǵatynda QR Іshki ister mınıstri Qalmuhanbet Qasymov osylaı málim etti.
Mınıstrdiń aıtýynsha, elimizdiń túzeý mekemelerinde jyl saıyn 12 mlrd teńgeniń ónimderi shyǵarylady. Bulardyń seksen paıyzy túzeý mekemeleriniń ózindik qajettilikterin óteýge joldanady.
«Túzeý mekemeleri kásiporyndarynyń áleýeti kóp emes. Sondyqtan da, biz kásiporyndardyń tehnıkalyq qýatyn arttyrýǵa, olardy jańǵyrtýǵa qatysty jumystardy atqaryp jatyrmyz. Osyǵan oraı, básekelestikti arttyrý mańyzdy. Bul baǵytta Úkimet jaqynda ǵana túzeý mekemelerindegi kásiporyndardyń taza tabystaryn salyqtan bosatý týraly sheshim qabyldady», dedi Q. Qasymov.
Budan bólek, jańa jyldan bastap Qylmystyq atqarý júıesiniń kásiporyndary taýarlar, qyzmetter men jumystar boıynsha memlekettik satyp alýlar týraly zańdy qoldanbastan kelisimsharttar jasaı alady. Bundaı tájirıbe Reseı men Belarýs elderinde bar kórinedi.
«Bul da jetkiliksiz. Sondyqtan da, qazirgi kúni qylmystyq atqarý júıesindegi kásiporyndarǵa memlekettik qorǵanys tapsyrystaryn oryndaý máselesi qarastyrylýda. Atap aıtqanda, áskerı kıim formalaryn, Qorǵanys kúshteriniń aıyrma belgilerin, basqa da áskerı qurylymdardyń kıim úlgilerin shyǵarýdy josparlamaqpyz. Mundaı sharalar kesheni qylmystyq atqarý júıesi kásiporyndarynyń qyzmetin qamtyp, sottalýshylardy jumyspen qamtýǵa septigin tıgizer edi», dedi Q. Qasymov.
