Túrmedegi medıtsınalyq bólimsheler Densaýlyq saqtaý mınıstrliginiń qaraýyna berilýi tıis - Ádilet mınıstrligi
ASTANA. Shildeniń 22-si. QazAqparat /Jasulan Amanbaıuly/ - Ádilet mınıstrligi Úkimetke Qylmystyq-atqarý júıesi komıtetiniń medıtsınalyq qyzmetin Densaýlyq saqtaý mınıstrliginiń qaraýyna berý týraly usynys tastady. Bul týraly búgin Ádilet mınıstrliginde ótken brıfıng barysynda vedomstvonyń resmı ókili Erbolat Erimbet málim etti,
dep habarlaıdy QazAqparat.
Búgingi ýaqytta eldegi Ádilet mınıstrligine qarasty túzetý mekemelerindegi medıtsınalyq bólimshelerdiń qyzmeti vedomstvonyń óz kúshimen uıymdastyrylyp kelýde. Onyń aıtýynsha, ondaǵy sottalǵandardy medıtsınalyq qyzmetpen qamtamasyz etý jaıy kemshin tartyp otyr. Sonyń esebinen túrme qabyrǵasynda jazalaryn ótep júrgen sottalǵandardyń ólim-jitimi kóbeıgen. Mınıstrliktiń 2010 jylǵy jumysyn pysyqtaý barysynda da bul másele keńinen kóterildi.
«Sottalǵandardyń densaýlyqtaryn áldeqaıda jiti, kásibı túrde qamtamasyz etý úshin, Ádilet mınıstri Rashıd Túsipbekov Qylmystyq-atqarý júıesi komıtetiniń medıtsınalyq qyzmetin Densaýlyq saqtaý mınıstrliginiń qaraýyna berý máselesin qaraý jóninde usynys tastady», deıdi E. Erimbet.
«Qazir bul usynysty Úkimet qarap jatyr. Ázirshe bizge Densaýlyq saqtaý mınıstrliginen qandaı da bir jaýap kelip túsken joq. Mınıstr R. Túsipbekovtiń tapsyrmasy boıynsha bul másele jyldyń sońyna deıin pysyqtalýy tıis», dedi resmı ókil.
