Túrmedegi qylmyskerge jaıly jaǵdaıyn jasaǵan maıor sheninen aıyryldy
«Aqmola oblysynyń sybaılas jemqorlyqqa qarsy qyzmeti buryn ETs-166/18 mekemesi bastyǵynyń rejımdik jáne jedel jumys jónindegi orynbasary, ádilet maıory R.M.Qojahmetovke qatysty sybaılas jemqorlyq qylmysyn jasaǵany úshin kúdikti retinde qatysty tergeý júrgizgen edi. Ol azamattan osy mekemede jazasyn ótep jatqan ulyna jalpy qamqorlyǵy úshin «Qiwi» elektrondyq ámııany arqyly 400 myń teńge kóleminde para aldy dep kúdiktelgen», - delingen Sybaılas jemqorlyqqa qarsy agenttiktiń baspasóz habarlamasynda.
21 qańtarda Stepnogorsk qalalyq sotynyń úkimimen R.M.Qojahmetov para alǵany úshin kináli dep tanylyp, oǵan 12 mln teńge kóleminde aıyppul salyndy jáne ómir boıyna memlekettik qyzmette laýazym ıelený quqyǵynan, sondaı-aq «Ádilet maıory» arnaıy sheninen aıyryldy.
