Túrmedegi búlik: 13 adam qaza taýyp, 8-i aýyr jaralandy
ASTANA. QazAqparat - Meksıkanyń Kadereıta qalasyndaǵy túrmede búlik shyqty.
Nýevo-Leon shtatynyń qaýipsizdik qyzmetiniń ókili Aldo Fassı málimdegendeı, búlik shyǵarǵan sottalýshylar úsh kúzetshini tutqynǵa alǵan.
«Bılik uzaq ýaqyt boıy olardy bosatý kelisózderin júrgizdi, alaıda ol sátsiz aıaqtaldy. Sodan keıin shabýyl jasap, búlikshilerge qarsy qarý qoldaný týraly sheshim qabyldandy», - degen Fassıdiń sózin keltiredi The Washington Post.
Sondaı-aq, ol búliktiń shyǵýyna túrmedegi qylmystyq toptardyń jaýlasýy sebep bolǵanyn naqtylady. Meksıka túrmesiniń ókili aıtqandaı, shabýyl jasalǵanda 13 sottalýshy qaza taýyp, 8 adam jaralanǵan. Quqyq qorǵaý organynyń bir qyzmetkeri de jaraqat alǵan.
