Túrmedegi bos óndiristik oryndar kásipkerlerge beriledi – komıtet
NUR-SULTAN. QazAqparat – QR ІІM Qylmystyq-atqarý júıesi komıteti kásipkerlerdi abaqtydaǵy sottalýshylardy birlesip jumyspen qamtýǵa shaqyrdy, dep habarlaıdy QazAqparat tilshisi.
Bul týraly QR ІІM Qylmystyq-atqarý júıesi komıteti tóraǵasynyń orynbasary Esqalı Salamatov Nur-Sultan qalalyq kásipkerler palatasy uıymdastyrǵan dóńgelek ústelde aıtty.
«Bıyd Іshki ister mınıstrligi ishinde Qylmystyq-atqarý júıesi jyly bolyp jarııalandy. Biz QAJ sheńberinde sottalǵandardy jumysqa ornalastyrýdy basym baǵyt dep belgiledik. Bul másele óte mańyzdy. Qazirgi ýaqytta túrmede jazasyn ótep jatqan 23,5 myń adamnyń 9 myńy ǵana jumys isteıdi, bul 40% quraıdy. 9 myń adamnyń 36% kúnine birneshe saǵat qana jumys isteıdi, ıaǵnı formaldy jumyspen qamtylǵan. Biz bul problemamen shyndap kúresýge daıynbyz», - dedi E. Salamatov elordada ES – 166/10 mekemesinde ótken dóńgelek ústelde.
Búgingi tańda túrmede otyrǵan 7,4 myń sottalýshy memleket pen jábirlenýshilerge 296 mıllıard teńge qaryz. 2019 jyly onyń 1,5 mlrd teńgesi ǵana tólengen.
«Sondyqtan bizdiń basty mindetimiz – sottalǵandardyń jumys istep, qaryzdaryn tóleýi úshin barynsha jumyspen qamtý. Taldaý nátıjesi kórsetkendeı, jumyspen qamtylǵan sottalýshynyń problemasy az. Jumys isteıtin adamdar shaǵym jazbaıdy, aqsha tabady, qaryzyn tólep, otbasylaryna kómektesedi jáne olardyń shartty túrde merziminen buryn bosap shyǵatyn múmkindikteri kóp. Jumyssyz sottalýshylar da jumys istegisi keledi. Saýalnama júrgizgende, tutqyndardyń 99% jumys istep, otbasylaryna kómekteskisi keletinin aıtqan», - deıdi spıker.
Onyń aıtýynsha, sońǵy on jylda Qazaqstandaǵy túrmeler sany 2 esege azaıǵan.
«2010 jyly elimizdegi túrmelerde 63,5 myń sottalýshy jazasyn ótegen. Qazir tergeý ızolıatorlarymen birge eseptegende 29 myńǵa jetedi. Mundaı jetistikke kez kelgen el qol jete bermeıdi. Bul jyldary zańnama izgilendirildi, Kodeks qabyldandy, probatsııa qyzmeti quryldy, birneshe mekeme qysqardy, qarjylandyrý jaqsardy. Túrmedegi adamdar ındeksi boıynsha, ıaǵnı sottalǵandar sany boıynsha Qazaqstan shamamen 100-orynda tur. Al 2010 jyly Qazaqstan bul kórsetkishte 13-orynda edi», - dedi E. Salamatov.
Sonymen birge, E. Salamatov kásipkerlerdi QAJ júıesindegi bos óndiristik alańdarda jumys isteýge shaqyrdy.
«Qazirgi ýaqytta túrmelerde 390 myń sharshy metr óndiristik alań bar, onyń 110 myń sharshy metri bos. Bos orynǵa sottalǵandardy jumysqa alýǵa jáne jalaqy tóleýge daıyn kásipkerlerdi shaqyramyz. Árıne, kásipkerlerdiń mekeme ákimshiligimen, «Eńbek» RMK ókilderimen til tabysa almaıtyn sátteri bolady. Sondyqtan, jaqyn arada biz QAJ komıtetinde qylmystyq-atqarý júıesinde jumys isteıtin kásipkerlerdi qorǵaý keńesin quramyz. Biz ár kásipkerdi qorǵaýǵa alamyz, árqaısysymen ózara kómek týraly memorandým jasasýǵa daıynbyz», - dedi QAJ ókili.
Óz kezeginde «Dandmard» JShS dırektory Muhtar Káribaev 13 sottalýshyny jumyspen qamtyp otyrǵanyn jetkizdi jáne olardyń sanyn taǵy arttyrýdy kózdep otyr.
«Búginde bizde arnaıy kostıýmder, áskerı jabdyqtar shyǵaratyn tórt sheberhana bar, oǵan qosa shulyq óndirisin de qolǵa aldyq. Bizde 13 sottalǵan adam jumys isteıdi, olardyń 12-si er adam jáne bireýi áıel. Qazir olar tájirıbeden ótip, óz mamandyqtary boıynsha bilim alýda. Aldaǵy ýaqytta júz adamǵa deıin jumyspen qamtı alamyz. Atap aıtqanda, bul adamdar tsehta jumys isteıdi. Olardyń tasymalyn óz jaýapkershiligimizge aldyq. Tańerteń qansha adam shyqqanyn tirkep, alyp ketemiz, tamaqtandyramyz jáne keshke ákelemiz. Múmkindik bolsa, biz túzetý mekemesinde óndiris ashýǵa da daıynbyz», - dedi kásipker.
Sonymen birge, «Astana-Zelenstroı» JShS, «PIK ıÝTARIıA LTD» JShS, «Astana Tazalyq» JShS, «BAZIS Construction» JShS sottalýshylardy monolıtshi, gaz elektr dánekerleýshi, ınjener, qurylysshy, slesar, elektrık, júrgizýshi, tazalaýshy, tiginshi, santehnık kásipteri boıynsha jumyspen qamtýǵa daıyn.
