Túrmede jazasyn óteýshiler kózi nashar kóretin balalarǵa syılyq jasady
PAVLODAR. QazAqparat – Pavlodardaǵy AP-162/4 túzetý mekemesinde jazasyn óteýshiler kózi nashar kóretin balalarǵa syılyq jasady, dep habarlaıdy QazAqparat tilshisi atalmysh mekemeniń bastyǵy mindetin atqarýshy Dáýlet Makınge silteme jasap.
Pavlodar oblysy boıynsha qylmystyq-atqarý júıesi departamenti men AP-162/4 mekemesiniń qyzmetkerleri oblystyq mamandandyrylǵan jalpy bilim beretin mektep-ınternatyna baryp qaıtty. Kózi nashar kóretin múgedek balalardyń mamandandyrylǵan mektebi qaýipsizdikke jáne densaýlyqty jaqsartýǵa baǵyttalǵan barlyq qurylǵylarmen jabdyqtalǵan. Jazǵy demalys bolǵandyqtan, mektepte qazir balalar joq. QAJD qyzmetkerlerin mektep dırektory Aıtjan Smaıylov pen áleýmettik pedagog Aıjan Qaıyr erekshe qurmetpen qarsy aldy.
«Balalardyń arasynda hatty Braıl shrıfti arqyly oqıtyndar bar. Olar «sıqyrly qalamǵa» qol jetkizýdi armandaıdy. Mundaı grıfelderdi dúkenderden tabý qıyn jáne tapsyrys boıynsha ǵana ázirlenedi. Syılyqtaryńyz úshin zor alǵysymyzdy bildiremiz. Balalar bul álemniń qyzyl-jasyl qyzyqtaryn kóre almaýy múmkin. Degenmen, olar kómek qolyn sozǵan jandardyń jylýyn sezinedi. Barlyq balalar men olardyń ata-analarynyń atynan sizderge rahmet aıtýǵa ruqsat etińizder», - dedi Aıjan Qaıyr sottalǵan azamattar syılaǵan grıffelderdi alyp jatyp.
Sottalǵandardyń qolymen jasalǵan grıfelderdi ázirleý «Mektepke jol» respýblıkalyq aktsııasy aıasynda qolǵa alynǵan. Jazasyn óteýshiler kómekke muqtaj balalardy qýantýǵa erekshe yqylaspen jumylǵan. Sonymen birge, temir tordyń ar jaǵyndaǵy adamdar balalar úshin arnaıy doıby taqtasy men oıynshyqtardy da berip jibergen.
Kezdesý sońynda mektep dırektory QAJD departamentiniń basshylyǵyna Alǵys hat tapsyryp, jazasyn óteýshilerge balalardyń zor alǵysyn jetkizýdi surady.
AP-162/4 túzetý mekemesiniń jazasyn óteýshileri kózi nashar kóretin balalarǵa buǵan deıin de kómektesken. Osylaısha, sottalǵandar jazasyn óteýmen birge, qoǵamǵa paıdaly ispen aınalysyp keledi.
