Túrmede jazasyn ótep jatqandar januıalarymen beınebaılanys arqyly júzdesti
TALDYQORǴAN. QazAqparat - Halyqaralyq Otbasy kúninde temir tordyń ar jaǵynda jazasyn ótep jatqandar januıalarymen beınebaılanys arqyly júzdesti, dep habarlaıdy QazAqparat tilshisi.
Búgin Almaty jáne Pavlodar oblystary boıynsha qylmystyq-atqarý júıesi departamentteriniń bastamasymen jáne Almaty oblysy prokýratýrasynyń qoldaýymen LA-155/4 jáne AP-162/4 penıtentsıarlyq mekemelerinde jazasyn ótep jatqan erli-zaıyptylardyń beınebaılanys arqyly júzdesýi uıymdastyryldy.
Erli-zaıyptylar esirtki satqany úshin jazasyn ótep jatyr. Ekeýi de 10 jylǵa bas bostandyǵynan aıyrylǵan. 2 balasy bar. Úlken uly 10 jasta. Apasynyń qaraýynda, al ekinshi qyzy anasymen birge LA-155/4 mekemesiniń janyndaǵy balalar úıinde turady.
«Biz mekeme ákimshiligine jubaıymmen beıne júzdesý ótkizgeni úshin alǵys aıtamyz. Meniń qyzym ákesin kórip, qatty qýandy. Uıymdastyrýshylarǵa alǵysymdy bildirgim keledi. Ár otbasynyń shańyraǵy berik bolsyn», - dedi sottalýshy ana.
Al uıymdastyrýshylar mundaı shara sottalýshylardyń tártibine oń áserin tıgizedi degen úmitte.
«Mekemelerdiń kelisimi boıynsha sottalǵandardyń zańǵa baǵynatyn minez-qulqy úshin jazasyn óteýshilerge beıne-sóılesý múmkindigi berildi.Óz otbasymen birigýge umtylý sottalǵandardy túzeý úshin mańyzdy yntalandyrý bolyp tabylady», - dep atap ótti Almaty oblysy QAJD bastyǵynyń orynbasary Jánibek Qosjanov.
