Túrmede tártip bolmasa qoǵamda birjaqty oı qalyptasady - professor Qoǵamov
ASTANA. QazAqparat - Astanadaǵy «Túrmelerdi tıimdi basqarý: bas bostandyǵynan aıyrý oryndarynda sybaılas jemqorlyqty joıý» atty jıynda zań ǵylymdarynyń doktory, professor Marat Qoǵamov tuńǵysh ret ótkizilgen ulttyq jınalysta kóterilgen máseleniń mańyzy zor ekenin aıtyp ótti, dep habarlaıdy «QazAqparat» HAA tilshisi.
«Ulttyq otyrystyń maǵynasy aýqymdy profılaktıkalyq mańyzǵa ıe. Jınalystyń mańyzyn, kótergen máselesin mindetti túrde halyqqa jetkizý kerek. Bul jınalystaǵy kóterilgen máseleniń qylmystyq-atqarý júıesindegi qyzmetkerler men jazasyn óteýshiler úshin profılaktıkalyq mańyzy zor esepteımin. Olardyń biri para alýdan shektelse, ekinshilerge azamattyq qoǵam men memleket bul máseleni erekshe nazarǵa alǵanyn kórsetedi», - deıdi Marat Qoǵamov.
Professordyń aıtýynsha, kóptegen qujattardy aqtarǵan adamǵa bul taqyryptyń ózekti ekeni birden uǵynyqty bolady.
«Eger bul sharýaǵa negizdi túrde kirispese, jazasyn óteý oryndarynda jemqorlyq quryqtalmasa, qoǵamda eshqashan jaza ádil bolmaıdy degen birjaqty pikir qalyptasyp qalýy múmkin. QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary (Alık Shpekbaev - avt.) tirkelgen birneshe faktilerdi atap ótti (túrmedegi sybaılas jemqorlyqqa qatysty - avt). Iá, bul turǵyda mańyzdy másele bar. Ony sheshý kerek», - deıdi ol.
Marat Qoǵamovtyń sózine sáıkes, barlyq jazasyn óteýshiler qandaı bappen túrmede otyrǵanyna qaramastan, halyqtyń áleýmettik jaǵynan az qorǵalǵan (nemese áljýaz) tobyna jatady.
«Kez kelgen adam jazasyn óteý ornynda otyryp, barynsha óziniń jaǵdaıyn jaqsartý jaǵyn oılastyrady. Bul óz tarapynan sybaılas jemqorlyqty týyndatatyn óte kúshti faktor deýge bolady. Kez kelgen adam jazasyn óteý ornynda nemese odan tys zańmen quqyǵy shektelgen jaǵdaıda óziniń jaǵdaıyn jaqsartý jaǵyna baryn salady. Álbette, belgili bir jaǵdaılarda qylmystyq-atqarý júıesiniń personaly jemqorlyqqa baryp jatady. Sondyqtan, búgingi jınalystyń mańyzy óte zor dep esepteımin. Bul kúrdeli salada memlekettik organ qyzmetkerleri jumysynyń belgili bir modelin oılastyramyz degen oıdamyn», - dep túıdi professor.
