Túrmede otyrǵan Ermegııaev ishimdik iship, ınternetti erkin qoldanǵan - Ulttyq bıýro
ASTANA. QazAqparat - Jemqorlyqqa qarsy is-qımyl ulttyq bıýrosy Astana qalasyndaǵy kolonııa basshylyǵynyń óreskel áreketiniń jolyn kesti, dep habarlaıdy QazAqparat.
Elordadaǵy qatań rejımdegi kolonııa basshylyǵy «Astana EKSPO-2017» UK basqarmasynyń burynǵy tóraǵasy Talǵat Ermegııaevke qamqorlyq jasaǵany anyqtaldy.
Ulttyq bıýro málimetine qaraǵanda, sottalýshy T.Ermegııaevtiń jazasyn jaıly jaǵdaıda ótkizýine múmkindik jasaǵan ETs-166/10 túzeý mekemesiniń bastyǵy, ádilet polkovnıgi N.Áben men onyń orynbasary, ádilet maıory T.Musaev sot santsııasymen ustalyp, tutqynǵa alyndy.
«Joǵaryda atalǵan tulǵalar T.Ermegııaevke turaqty túrde alkogol ishimdikterin ishýge únemi jaǵdaı jasap, uıaly telefon men ınternetti erkin paıdalanýǵa, sonymen qatar úzdiksiz kezdesý ótkizýine múmkinshilik bergen. Atalǵan óreskel zań buzýshylyqtarǵa jol bergeni úshin qylmystyq atqarý júıesiniń 13 laýazymdy tulǵasy da tártiptik jazaǵa tartyldy. Onyń ishinde 11-i qyzmetinen bosatylyp, ekeýine qyzmetine tolyq saı kelmeıtindigi eskertildi. Sotqa deıingi tergeý amaldary júrgizilýde», - delingen taratylǵan aqparatta.
Aıta keteıik, Talǵat Ermegııaev 2016 jyldyń maýsym aıynda jemqorlyq jáne iri kólemde bıýdjet qarajatyn jymqyrǵany úshin 14 jylǵa sottalǵan bolatyn.
