Aqtóbede túrmede otyryp, para bergen jazasyn óteýshi taǵy sottaldy

AQTÓBE. KAZINFORM — Aqtóbede esirtki zattaryn daıyndap, adam óltirgen tis tehnıgi taǵy jaza arqalady. Bul joly ol túrme qyzmetkerine para usyndy.

№ 2 Aqtóbe qalalyq sotynda sottalýshy M. Súıinǵarınge qatysty is qaraldy.

33 jastaǵy sottalýshyǵa Qylmystyq kodekstiń «Para berý» baby boıynsha aıyp taǵyldy.

Іs materıalyna súıensek M. Súıinǵarın № 70 túzetý mekemesinde otyryp, laýazymdy tulǵaǵa para bermek bolǵan. Ol baqylaýshymen tanysyp, ózine telefon, qýattaǵysh, qulaqqap jáne sim kartany ótkizip berýin suraıdy. № 70 mekeme qyzmetkeri usynystan bas tartady. Keıin hattama toltyrady. Sottalýshy biraz ýaqyt ótken soń mekeme qyzmetkerine taǵy aıtyp, 70 000 teńge para usynady. Sol kezde mekeme qyzmetkeri aldyn ala kelisimmen, usynysyn qabyldaıdy.

Sottalýshy esh kúmándanbaı josparyn quryp, bir kamerada jatqan jazasyn óteýshige ózge ótinish aıtady. Tipti jazasyn óteýshiden inisine ótinish jasaýyn, sóıtip telefon men aqshany ala kelýin ótinedi. Jazasyn óteýshi bir kamerada jatqan sottalýshynyń sózine senip, kómektesedi. Іnisi aǵasynyń ótinishimen mekeme qyzmetkerine habarlasyp, kezdesý ornyn bilgileıdi. Sóıtip azyq-túlik dúkeniniń aldyna aqsha, telefondy beredi.

Sottalýshy sotta kinásin moıyndamady. 

Sot úkimimen Meırambek Súıinǵarın aıypty dep tanylyp, Qylmystyq kodekstiń «Para berý» babymen 2 jyl 6 aıǵa bas bostandyǵynan aıyrý jazasy taǵaıyndaldy.

Sot Qylmystyq kodekstiń 58-baby 3,6-bóligine súıenip, túpkilikti 19 jyl 3 aı merzimge bas bostandyǵynan aıyrdy.

Eske salsaq, Aqtóbede mektep muǵalimi men tis tehnıgi esirtki zattaryn daıyndap, adam óltirgeni úshin 19 jylǵa sottaldy. Árqaısysy jábirlenýshiniń otbasyna 10 mln teńgeden moraldyq ótemaqy tóleýi tıis.