Túrmede medqyzmetkerlerdiń jetispeýshiligi problemasy sheshiledi - Janat Eshmaǵambetov

NUR-SULTAN. QazAqparat - 2021 jyldyń basynda túrmelerdegi medıtsına qyzmetkerleriniń jetispeýshiligi problemasy sheshiledi. Bul týraly QR Іshki ister mınıstrligi Qylmystyq atqarý júıesi komıtetiniń tóraǵasy, polıtsııa polkovnıgi Janat Eshmaǵambetov aıtty, dep habarlaıdy QazAqparat tilshisi.

«Qazirgi ýaqytta medıtsına qyzmetkerleriniń jetispeýshiligi men medıtsınalyq qural-jabdyqtardyń eskirýi syndy problemanyń bar ekendigin moıyndaýymyz qajet. Sebebi belgili - tómen jalaqy, turǵyn úı jaǵdaıynyń bolmaýy. Múddeli organdarmen birlesip, bul másele pysyqtaldy jáne kelesi jyldyń basynda osynaý problema sheshiledi», - dedi Janat Eshmaǵambetov.

Onyń atap ótýinshe, medıtsınalyq qural-jabdyqtar osydan 7-8 jyl satyp alynǵan.

«Medıtsına bir orynda turǵan joq jáne qazirgi jaraqtandyrylǵan qural-jabqytar tehnıkalyq turǵyda eskirdi jáne jańartýdy qajet etedi. Qarjylandyrýdyń jetkiliksizdigin eskere otyryp, jergilikti bıýdjetterdiń qosymsha qarajattaryn paıdalaý múmkindigi qarastyrylyp jatyr. Óıtkeni, kóp jaǵdaıda jazasyn ótep jatqan tulǵalar sol óńirlerdiń turǵyndary sanalady», - dedi komıtet tóraǵasy.