Túrmede koronavırýs «juqtyrǵan» 22 jastaǵy sottalýshy bosandy
TALDYQORǴAN. QazAqparat - La 155/4 túzeý mekemesinde 22 jastaǵy sottalýshy bosandy, dep habarlaıdy QazAqparat tilshisi.
Jazasyn ótep jatqan sottalýshy 28 sáýir kúni saǵat 22:50 de qyz balany dúnıege ákeldi. Qazir bala da ana da Іle aýdandyq aýrýhanasynda.
Dárigerlerdiń aıtýynsha, olardyń densaýlyǵy jaqsy. Qazir kishkentaı nárestesin baýyryna alǵan 1998 jylǵy jas ana barlyq qyzmet kórsetken dágirlerge, LA 155/4 Túzeý mekemesiniń qyzmetkerlerine alǵysyn bildirýde.
«Іle aýdandyq aýrýhanasynyń dárigeri Aıjan Shynybaevaǵa, Gúlzada Jahanovaǵa, Amangúl Áshimbetovaǵa úlken alǵysymdy bildiremin. Meniń jáne balamnyń ómirine alańdaýshylyq bildirip, barynsha qoldaý kórsetti. Aman-esen bosandym, jaǵdaıymyz jaqsy. LA 155/4 Túzeý mekemesiniń basshylyǵyna alǵysym sheksiz. Meniń jaǵdaıymdy túsinip, aýrýhanaǵa ákeldi. Maǵan qoldaý kórsetken barsha jandarǵa rahmet», - dedi 22 jastaǵy jazasyn óteýshi.
LA 155/4 Túzeý mekemesiniń basshysy Madııar Qonqanovtyń aıtýynsha, ana men bala túzeý mekemesine oralǵan soń jeke bólmege ornalastyrylady. Sebebi jazasyn óteýshilerdiń balalaryn dúnıege kelgennen 3 jasqa deıin tárbıeleıtin balalar úıi karantınge jabylǵan.
Esterińizge sala keteıik, buǵan deıin LA 155/4 Túzeý mekemesinde aıaǵy aýyr sottalýshydan koronavırýs anyqtalǵany habarlanǵan bolatyn. Artynsha jazasyn óteýshi qaıtalap tapsyrǵan synama qorytyndysy indetke teris nátıje berip, túzeý mekemesinde jarııalanǵan karantın Іle aýdanynyń bas sanıtarlyq dárigeriniń qaýlysymen alynyp tastaldy.
