Túrmede kásiptik bilim alyp jatqan 200 sottalýshy qashyqtan oqýda
KÓKShETAÝ. QazAqparat - Aqmola oblysynyń QAJ (qylmystyq-atqarý júıesi) departamentiniń túzeý mekemelerindegi kásiptik bilim beretin kolledjder bólimsheleriniń 200 stýdenti qashyqtan oqytý júıesine kóshti, dep habarlaıdy QazAqparat tilshisi vedomstvonyń baspasóz qyzmetine silteme jasap.
Vedomstvonyń málimetinshe, Aqmola oblysynyń QAJ departamentiniń túzetý mekemelerinde kásiptik bilim beretin kolledjderdiń úsh bólimshesi jumys isteıdi. «Munda jyl saıyn qazirgi eńbek naryǵynda suranys joǵary 250-den astam kásibı maman bilim alyp shyǵady. Búgingi kúni koronavırýs ınfektsııasynyń taralýyna jol bermeý úshin engizilgen tótenshe jaǵdaıǵa baılanysty elimizdegi mektep oqýshylary men stýdentter qashyqtan bilim alýda. Penıtentsıarly júıedegi bilim mekemeleri de, azamattyq bilim berý sııaqty qashyqtan oqytýǵa kóshti», - deıdi vedomstvodan. Qazirgi kezde Aqmola oblysynyń QAJ departamentiniń túzetý mekemelerindegi kásiptik bilim beretin kolledjderdiń 200 stýdenti qashyqtan bilim alý, vıdeokórsetilim júıesine kóship otyr. Elimizdegi mektepter 2016 jyldan bastap www.bilimland.kz platformasyna tirkelip, jumys istese, al QAJ túzetý mekemelerindegi jalpy bilim berý mektepteriniń oqýshylary men kásiptik bilim beretin kolledjderdiń stýdentterin qashyqtan oqytý ádisi birshama ózgeshe. Ustazdar ózin-ózi oqshaýlaýda otyryp, oqytý baǵdarlamasyna sáıkes, pánder boıynsha oqytý vıdeosy, ártúrli jattyǵý, baqylaý testin ázirlep, sottalǵandardy oqytý úrdisine jaýapty túzetý mekemesiniń qyzmetkerlerine joldaıdy. Olar óz kezeginde sabaqtyń ótýi jáne oqýshylar men stýdentterdiń oǵan qatysýyn qamtamassyz etedi. «Sottalýshy-stýdentter jáne oqýshylardyń jaǵdaıǵa qaramastan tıisti bilim alǵany, al ustazdarǵa ózderiniń jaýapty isi oqytýdy jalǵastyrǵany mańyzdy», - deıdi Aqmola oblysynyń qylmystyq-atqarý júıesi departamentiniń ETs166/18 túzetý mekemesi kásiptik bilim beretin kolledj bólimshesiniń meńgerýshisi Galına Bonar.
