Túrmede 3,5 jyl jazyqsyz otyrǵan Qaraǵandy turǵyny ótemaqy óndirip aldy
QARAǴANDY. QazAqparat - Qarjy mınıstrligi jalǵan kásipkerlik jasady degen aıyppen jazyqsyz alty jylǵa sottalǵan Qaraǵandy turǵyny Mıhaıl Eshýtkınge alty mıllıon teńge óndirip berdi, dep habarlaıdy «QazAqparat» HAA tilshisi.
Ol sot tyńdalymy men tergeý merzimin qosqanda, úsh jarym jyl temir tordyń ar jaǵynda otyryp shyqqan.
Mıhaıl Eshýtkın iri kólemdegi aqshany ıemdený maqsatynda jalǵan mámile jasady jáne jalǵan kásiporyn qurdy degen kúdikke ilikken. Sot Eshýtkındi alty jylǵa bas bostandyǵynan aıyrǵan. Onyń advokaty Igor, apellıatsııalyq shaǵym túsirse de, úkim ózgerissiz qalady. Biraq Joǵarǵy sot úkimniń kúshin joıyp, qylmystyq istiń materıaldaryn departamentke joldaıdy. Nátıjesinde, tergeý organy qateleskenin túsinip, tergeýdi toqtatady. Eshýtkındi bosatady. Keıin Prezıdenttiń Jarlyǵymen departament qaıta qurylyp, shtat qysqarady.
Qaraǵandy qalasy №2 Qazybek bı aýdandyq sotynyń baspasóz qyzmeti habarlaǵandaı, Mıhaıl Eshýtkın men onyń advokaty sotqa talap aryz túsiredi. Onyń jaýapkeri Qarjy mınıstrligi men onyń Qaraǵandydaǵy bólimshesi - memlekettik kirister departamenti boldy.
«Talapker moraldyq shyǵyn ótemaqasy retinde 15 mıllıon teńge men materıaldyq shyǵyn retinde 6 mıllıon 24 myń 396 teńge suraǵan. Onyń shaǵymy jartylaı qanaǵattandyryldy. Sot jaýapkerden 2 mıllıon teńge moraldyq zalal, 3 mıllıon 552 myń 860 teńge materıaldyq shyǵyn, 500 myń teńge - zań ókiliniń qyzmeti úshin jáne BJZQ-ǵa zeınetaqy tólemin aýdarý úshin 181 myń 500 teńge óndirý úkimin shyǵardy», - dep habarlady aýdandyq sottyń baspasóz qyzmetinde.
Er adam moraldyq ótemaqynyń somasymen kelispeıtindigin alǵa tartyp, jazyqsyz 3 jyldan astam ýaqyt túrmede otyrǵany úshin 15 mıllıon teńge surap otyr.
Budan bólek, jaýapker óz kinásin moıyndamaıtyndyǵyn málimdedi. Sebebi, olar qarjy polıtsııasynyń sol kezdegi jaýapty tulǵasy óziniń kásibısizdigi úshin jeke jaýap berýi tıis dep otyr.
