Túrme qyzmetkeri poıyz jolaýshysynyń ómirin aman alyp qaldy - Qostanaı
QOSTANAI. QazAqparat - Arqalyq-Qostanaı poıyzynda ÝK-161/12 mekemesiniń sottalǵandar arasyndaǵy eńbek jáne turmystyq ornalastyrý jónindegi ınspektory Saltanat Dosybaeva tunshyǵyp qalǵan jolaýshyǵa járdem berdi, dep habarlaıdy QazAqparat.
Oqıǵa 12 aqpan kúni Arqalyq-Qostanaı jolaýshylar poıyzynyń ishinde boldy. Kenet poıyz ishindegiler jolserikti kómekke shaqyrady.
«28 jastaǵy Shynar Jaqypova tunshyǵyp, júrek tusynyń aýyrǵanyn aıtady. Ol ár mınýt saıyn qınalyp, kómek suraıdy. Janyndaǵy adamdar qansha tyrysqanymen, kómektese almaǵan. Sol kúni qyzmettik saparda júrgen Saltanat Dosybaeva jolaýshyǵa járdem beredi. Tunshyǵyp jatqan Shynar Jaqypovaǵa alǵashqy kómek kórsetti», - deıdi ÝK-161/12 mekemesiniń psıhology Tatıana Karasevıch.
Poıyz 2 saǵattan soń Esil stansasyna jetedi. Jolaýshyny jedel járdem qyzmetiniń kóligi kútip aldy. Ol birden dárigerge júgindi.
«Shynar Jaqypova Arqalyqqa kelgen soń ózine járdem bergen Saltanat Dosybaevaǵa qaıta-qaıta alǵys aıtty. Shynar bizdiń áriptesimizdiń arqasynda jaqynda bolatyn týǵan kúnin atap ótetin boldy», - dedi T. Karasevıch.
Aıta keteıik, Saltanat Dosybaeva ÝK-161/12 mekemesiniń sottalǵandar arasynda eńbek jáne turmystyq ornalastyrý jónindegi ınspektory qyzmetin atqarady.
