Túrme dárigerleri Densaýlyq saqtaý mınıstrligine qaraýy tıis
ASTANA. QazAqparat - Túzeý mekemeleriniń dárigerleri Densaýlyq saqtaý mınıstrliginiń qaramaǵynda bolýy qajet. Bul týraly búgin «Quqyq qorǵaý organdary qyzmetiniń ashyqtyǵy» atty konferentsııa barysynda Adam quqyǵy jónindegi ýákildik janyndaǵy úılestirýshi keńestiń múshesi Sergeı Molchanov aıtty, dep habarlaıdy QazAqparat tilshisi.
«Qazaqstan múgedekter quqyǵy týraly konventsııany ratıfıkatsııalaǵan. Biz penıtentsınarlyq júıede múgedekterge arnalǵan ınfraqurylymnyń joqtyǵyn aıta bastaǵanymyzda olardyń Qylmystyq atqarý kodeksi boıynsha ómir súretindigi anyqtalady. Men olardy da túsinemin, olar ofıtserler, pagon taǵyp júr jáne óz zańdarynan attap kete almaıdy. Aldyńǵy qatarly halyqaralyq normatıvtik aktilerdi ratıfıkatsııalaǵandyǵymyzdy eskere otyryp, normatıvtik-quqyqtyq aktilerdi qaıta qaraý qajet», - dedi ol.
Sonymen qatar keńes múshesi dárigerlerdiń qylmystyq-túzeý mekemesi basshylaryna táýeldi ekendigin atap ótti.
«Penıtentsıarlyq mekemelerde jumys isteıtin dárigerlerge qatysty aıtar bolsaq, olar atalǵan mekeme basshysyna baǵynady. Osyndaı mekemelerdiń birine kirgenimizde soqqyǵa jyǵylǵan sottalýshyny kórdik jáne medıtsınalyq kitapshasyn kórsetýin suraǵanymyzdy onda túk jazylmaǵan bolyp shyqty», - dedi Sergeı Molchanov.
S.Molchanov túzeý mekemelerinde dári-dármekpen qamtamasyz etý jumystaryn da jetildirý qajettigin aıtty.
«Dári-dármektiń de túri óte az, eki-úsheý ǵana. Ortopedııalyq, stomatologııalyq máseleler de tolyq sheshilmegen. Sondyqtan dárigerlerdi Qylmystyq-atqarý júıesi komıtetiniń qaramaǵanyna shyǵaryp alyp, Densaýlyq saqtaý mınıstrligine berý qajet», - dedi ol.
