Túrme basshylary qamaýǵa alyndy
ASTANA. Maýsymnyń 29-y. qazAqparat - «Aqtaýdaǵy bir top tutqyn qashyp ketken 172/1 túzeý kolonııasynyń úsh laýazymdy qyzmetkeri qylmys jasady degen kúdikpen qamaýǵa alyndy», dep habarlady Іshki ister mınıstrliginiń resmı ókili Qýanyshbek Jumanov, dep jazady resmı buqaralyq aqparat quraldary.
Tutqynǵa alynǵan túzeý mekemesiniń bastyǵy, kolonııadaǵy jedel bólimniń bastyǵy jáne kezekshi-mekeme bastyǵynyń kómekshisiniń ústinen Qylmystyq kodekstiń 316-baby boıynsha qylmystyq is qozǵalǵan.
Ótken seısenbi kúni tańerteń Aqtaýdaǵy qatań tártip kolonııasynda jazasyn ótep jatqan 21 adam qashyp shyqpaqshy boldy. Olardyń qoldarynda qarý bolǵan. Sondyqtan túrme kúzetshileri qashqyndarǵa qarsy qarý qoldandy. Jeti qashqyn sol jerde qaza taýyp, jaraqat alǵan bireýi qolǵa tústi. Qalǵan 13 adam sytylyp shyǵyp, aptanyń aıaǵyna deıin Mańǵystaý oblysynda boı tasalap júrdi. Olardy ustaý úshin quqyq qorǵaý organdarynda «Quryq» operatsııasy jarııalandy.
Mańǵystaý oblystyq ishki ister departamenti baspasóz qyzmetiniń habarlaýynsha, arnaıy operatsııa senbi kúni keshki saǵat 22.00-de aıaqtalǵan. Qashqyndar senbi kúni Shetpe aýylynan 18 shaqyrym jerdegi Qyzylsaı shatqalynda qorshaýǵa alyndy. Quqyq qorǵaý organdarynyń málimetinshe, qorshaýǵa túsken qashqyndar qatty qarsylyq kórsetken eken. Óz erikterimen berilmegen soń, «Arlan» arnaıy jasaǵy qarý qoldanýǵa májbúr bolǵan.
Derekkózdiń málimdeýinshe, senbi kúni keshqurym Qyzylsaı shatqalynda kólikke mingen 17 adam qorshaýǵa alynady. Túrmeden qashyp shyqqan 13 tutqynnyń qasynda júrgen sybaılastary da bolǵan. Operatsııa aıaqtalǵanda deni túrmeden qashqyndardan quralǵan 17 adamnyń altaýy tirideı qolǵa túsken, olardyń tórteýine oq tıip jaraqat alǵan kórinedi. Kólikke bekingen qalǵandary tirideı berilgisi kelmeı, ózderin jaryp jiberipti. Kóliktegiler tegis qaza tapqan. Arnaıy operatsııa barysynda «Arlan» jasaǵynyń bir qyzmetkeri jaraqat aldy, dep habarlady derekkóz.
