Túrme aýmaǵyndaǵy «saqaldy qurylys»: ShQO-da aýyl qazandyǵy iske qosyldy
ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov Jarma aýdanyna jumys saparymen bardy. Onda Shýaq aýylyndaǵy OV-156/18 qylmystyq-atqarý júıesi mekemesiniń óndiristik aýmaǵynda júrgizilip jatqan jylý qazandyǵynyń qurylysymen tanysty, dep habarlaıdy QazAqparat.
Eske salsaq, jylý qazandyǵynyń qurylysy 2011 jyldyń mamyr aıynda bastalǵan. Josparǵa sáıkes nysan 2013 jyly qoldanysqa berilýi tıis edi. Alaıda, jobany iske qosý jumystary barysynda qıyndyqtar týyndaǵan. Budan bólek, 2016 jyly jobanyń bas qurylys merdigeri bolyp taǵaıyndalǵan «Qurylys-montaj kásiporyny – Almaty» JShS bankrotqa ushyrady. Jalpy aıtqanda, qurylys-montaj jumystary 71 paıyzǵa oryndalǵan. Osy kúnge deıin aýyl turǵyndary 1965 jyly salynǵan eski qazandyqty paıdalanyp otyr. Qazandyq mazýtpen jumys isteıdi. Danıal Ahmetovtiń aıtýynsha, sonyń saldarynan aıtarlyqtaı qarjy shyǵyndalyp otyrǵan. Jylý qazandyǵynyń eksplýatatsııasyna jyl saıyn 500 mıllıon teńge jumsalǵan. Soǵan qaramastan, úılerdegi jylý talapqa sáıkes kelmegen.
Semeı aqparattyq ortalyǵynan málim etkendeı, aǵymdaǵy jyl basynda komıssııa qurylyp, qurylysy bitpegen nysanda tehnıkalyq zertteý júrgizilgen. Sóıtip, shilde aıynda bul jumysqa «AzııaEnergoProektMontaj» JShS jańa merdiger bolyp taǵaıyndaldy.
Kompanııa túzetýler engizip, jobadaǵy qatelerdi jóndep, jylý qazandyǵynyń qurylysyn aıaqtady. Qazir nysandy iske qosý jumystary júrgizilýde.
«Birneshe kúnnen keıin jańa jylý qazandyǵy qoldanysqa beriledi. Osylaısha, qanshama jyldan beri turǵyndardy alańdatyp kelgen másele sheshimin tapty. 10 qazannan bastap aýyldaǵy barlyq úıge jylý beriledi», - dedi Danıal Ahmetov.
Aıta keteıik, Shýaq kentinde 500-ge jýyq otbasy turady. Onda kópqabatty 9 úı bar. Qylmystyq-túzeý mekemesinde ulttyq gvardııashylardy qosqanda 550 adam jumys isteıdi.
