Túrli ulttardyń birlikte ómir súrip jatqany qýantady - Tájik mádenı ortalyǵynyń tóraǵasy
KÓKShETAÝ. QazAqparat- Túrli ult ókilderiniń tatýlyqta bir teriniń pushpaǵyn ılep, baqytty ómir súrip otyrǵandyǵy qýantady. Bul týraly búgin «Sangı-Kabýd» tájik ulttyq-mádenı ortalyǵynyń tóraǵasy Ýmar Shonazarov aıtty, dep habarlaıdy QazAqparat tilshisi.
Ol pikirin Kókshetaýda ótken 1 mamyr - Qazaqstan halqynyń birligi kúni merekesinde jergilikti etnomádenı birlestikter usynǵan ər halyqtyń ulttyq taǵamdary men sándik-qoldanbaly jáne beıneleý óneri sheberleriniń kórmesi barysynda aıtqan edi.
Aıta ketý kerek, búgingi tańda Aqmola oblysynda 18 etnosty biriktiretin 50-ge jýyq etnomádenı birlestik bar. Al, ótken jyly olardyń qataryn «Sangı-Kabýd» tájik ulttyq-mádenı ortalyǵy tolyqtyrdy. Ataýyn qazaqshaǵa aýdarǵanda «Kókshetaý taýlary» degen maǵynany bildiretin bul birlestik 2017 jyldyń qarasha aıynda ashylǵan bolatyn.
«Jas kelse - iske» demekshi, kásibı sportshy, qazaq, arab, parsy tilderin erkin meńgergen isker jas Ýmar Shonazarovtyń jetekshiligimen tájik ulttyq-mádenı ortalyǵy ashylǵan kúnnen bastap-aq jumysqa qyzý kirisip ketti. Jýyrda ǵana olar Qazaqstan men Tájikstan arasyndaǵy dıplomatııalyq qarym-qatynasqa 25 jyl tolýyna arnap oblys ortalyǵyndaǵy Dostyq úıinde aýqymdy is-shara ótkizdi. Oǵan Qazaqstandaǵy Tájikstan memleketi elshiliginiń ókilderi, elimizdiń basqa da oblystaryndaǵy tájik ortalyqtarynyń jetekshileri qatysqan bolatyn.
«Sangı-Kabýd» atalatyn tájik ulttyq-mádenı ortalyǵy eki eldiń dıplomatııalyq qarym-qatynasynyń nyǵaıýyna, elimizdegi ulttar arasyndaǵy dostyqtyń bekı túsýine septigin tıgizetinine senim mol.
Bizben áńgimesinde ortalyq tóraǵasy Ýmar Shonazarov uıym halyqtar dostyǵyn, ultaralyq kelisim men qoǵamdaǵy turaqtylyqty nyǵaıtý maqsatynda qurylǵanyn erekshe atap ótti. Ashylǵanyna az ýaqyt bolsa da, ortalyq oblysymyzdaǵy birqatar aýyldardyń komandalary arasynda fýtboldan jarys uıymdastyryp úlgerdi. Bolashaqta olar jastar qanatyn, tilder ortalyǵyn ashýdy josparlap otyr. Qaıyrymdylyq sharalaryn ótkizý, jastardy qazaqstandyq patrıotızm rýhynda tárbıeleýdi kózdeıtin kezdesýler ótkizý de kelekshektiń enshisinde.
«Elimizdiń kóptegen oblystarynda boldym. Olardyń birazyn atap aıtsam, Qaraǵandy, Pavlodar, Qostanaı, Shymkent qalalarynda tájik ortalyqtary baryn kórip, ózimizdiń Kókshe jerinde de sondaı uıym bolǵanyn qaladym. Mine, sol armanym oryndalyp, ótken jyly Tuńǵysh Prezıdent kúni qarsańynda ortalyǵymyz saltanatty túrde ashyldy. Búginde oblysymyzda 200-ge tarta tájikter turady. Dostyq úıinde etnomádenı birlestikterdiń alańsyz jumys isteýine barlyq jaǵdaılar jasalǵan. Buryndary Assambleıa jaıly syrttaı ǵana estýshi edim. Endi sol uıymǵa ózim de múshe boldym. Rasymen de túrli ult ókilderiniń tatý-tátti bir teriniń pushpaǵyn ılep, baqytty ómir súrip otyrǵandyǵy qýantady. Búgin barsha qazaqstandyqtardy osy sətti paıdalana otyryp baqytqa bastaıtyn 1-mamyr-Qazaqstan halqynyń birligi merekesimen shyn júrekten quttyqtaımyn»,- deıdi Ýmar Faızýdınuly.
