Túrli reıtıngterdiń sońyna túsýdiń qajeti joq - senator
Otyrys barysynda QR Memlekettik qyzmet isteri jáne sybaılas jemqolyqqa qarsy is-qımyl agenttigi tóraǵasynyń orynbasary Oljas Bektenov EYDU usynystarynyń oryndalýy sharalaryn baıandap berdi. Osy oraıda ol Qazaqstan ótken jyldarda atqarylǵan jumystar boıynsha birqatar pozıtsııalar boıynsha ońtaıly baǵa alǵanyn atap ótti.
Óz kezeginde Senattyń Konstıtýtsııalyq zańnama, sot júıesi jáne quqyq qorǵaý organdary komıtetiniń tóraǵasy Georgıı Kım elimiz zańnamasy halyqqa qolaıly jaǵdaılar jasaýǵa baǵyttalaýy kerektigin atap ótti.
«Negizi, tıisti jumystar júrgizilip jatyr. Alaıda basqa elder bizge mindettep otyrǵan túrli reıtıngterdiń sońyna túsip, basqa sharalardy umytýdyń reti joq. Atap aıtqanda, sizderdiń jumystaryńyz eki baǵytqa negizdelýi kerek. Birinshiden, qarjy men jaqsy tehnologııalar tartylýy úshin ınvestorlarǵa barynsha qolaıly jaǵdaı jasaý kerek. Ekinshiden, atqarǵan jumystaryńyzdyń nátıjesinde halyqqa jaıly bolatyndaı qyzmetter kórsetilýi tıis. Al bul reıtıngter qarapaıym adamǵa neni beredi? Jalpy, osy baǵyttaǵy jumystar árbir adamnyń múddesine qaraı iske asyrylýy qajet. Turǵyndar kezekte turý, qyzmet alý úshin tanystardy izdeý sııaqty jónsiz áreketterge bastaryn qatyrmaýy kerek», - dedi senator vedomstvolar ókilderine qarata aıtqan sózinde.
Georgıı Kımniń atap ótýinshe, búginde zańnamada qyzmetkerlerdi yntalandyrýshy sharalarǵa ekpin qoıý kerek.
«Biz táýelsiz elmiz, ıaǵnı tıisti deńgeıge kóterilip, jan-jaqty damý baǵytyndamyz. Osy oraıda bizge sáıkes kelmeıtin usynystardy qabyldamaý erkindigimiz bar. Atap aıtqanda, keıbir jınaqtalǵan tájirıbemizge súıenip, halyqaralyq uıymdarǵa ózderiniń qadamdaryn túzetýge usynys jasaı alamyz. Bul turǵyda ózimizdiń tájirıbemizdi kórsete alatyn jaǵdaılar bar. Meniń oıymsha, búginde zańnama jazalaıtyn sıpatty jalǵastyra bermeýi tıis, zańnamada yntalandyrýshy qadamdardy qamtýy kerek», - dedi depýtat.
Foto: www.parlam.kz