Túrli mekemeler saıttaryn qazaq tilinde damytýdy aldymen memlekettik mekemeler qolǵa alýy qajet - M.Ábenov
ALMATY. 20 shilde. QazAqparat /Ádilet Musahaev/ - Basshylarymyzdyń kópshiligi halyq aldynda sóılegende basyn qazaqsha bastap, naǵyz ózekti jerine kelgende oryssha sóıleıdi.
Jáne onyń elektrondy aýdarmasyn esh jerden tappaısyń. Sondyqtan túrli mekemeler saıttaryn qazaq tilinde damytýdy aldymen memlekettik mekemeler qolǵa alýy qajet. Bul jaıynda búgin QR Májilis depýtaty Murat Ábenov Almatyda ótip jatqan «Internettegi qazaq tilin damytý joldary» taqyrybyndaǵy dóńgelek ústel barysynda málim etti.
Depýtat qazaq tilindegi portal, saıttardy jasaýda múmkinshilik az ekendigin, oǵan memleket tarapynan qoldaý qajet ekendigin de aıtyp ótti.
Jıyn barysynda sondaı-aq ınternettegi qazaq tilindegi kontent úlesin arttyrý men damytý úrdisteri, tanymal saıttardy basqarý júıelerin qazaq tiline aýdarý, bastaýysh veb-masterlerge jáne baǵdarlamashylarǵa qazaq tilinde járdem quraldaryn, veb-termınderdiń biregeı sózdigin jasaý máselesi kóterilip, talqyǵa tústi.
Qazaqstannyń ınternet qaýymdastyǵy ókilderiniń pikirinshe, qazirgi tańda Qaznette qazaq tilindegi saıttardyń sany jalpy qazaqstandyq saıttardyń 12 paıyzyn ǵana quraıdy eken. Jyl saıyn qazaq tilindegi jańa resýrstar paıda bolǵanymen memlekettik tildegi kontentterdi tanymal etýdiń jańa joldaryn izdestirý kerek deıdi jıynǵa qatysýshylar.
Atalǵan sharaǵa kóptegen qoǵamdyq birlestikter, tanymal ınternet-resýrstar, baılanys operatorlary jáne QR Mádenıet mınıstrligi ókilderi qatysýda.
Dóńgelek ústel «Qazaqstannyń ınternet qaýymdastyǵy» zańdy tulǵalar birlestigi «GSM Kazakhstan» JShS Kcell saýda belgisiniń qoldaýymen ótip jatyr.
