Túrli brendterdiń balalar kıimderinen qaýipti hımııalyq zattar tabyldy
ASTANA. 16 qańtar. QazAqparat - Greenpeace tapsyrysy boıynsha júrgizilgen zertteýlerge qaraǵanda, túrli brendterdiń balalar kıimderinen qaýipti hımııalyq zattar tabyldy. Degenmen, óndirýshilerdiń ózderi hımııalyq zattardyń deńgeıi qaýipsiz dep sanaıdy. Bul týraly Reseıdiń «Jańalyqtar» agenttigi habarlady.
«2013 jyldyń mamyr-maýsymynda zertteý júrgizý úshin álemniń 25 elindegi resmı dúkenderden nemese tirkelgen dılerlerden balalar kıimderiniń 82 úlgisi satyp alyndy. Brendter qatarynda GAP, H&M, Adidas, Nike, Puma, American Apparel, C&A, Disney, Primark, Uniqlo jáne lıýks sanalatyn Burberry brendi bar. Zertteý qorytyndysynda qaýipti hımııalyq zattardyń barlyq brend úlgilerine bar ekendigi anyqtaldy», - delingen aqparatta.
Disney, American Apparel jáne Burberry-di qosa alǵanda brendterdiń keminde 1 úlgisinen nonılfenol etoksılatynyń joǵary deńgeıi tirkelgen. Adidas fırmasynyń balalarǵa arnalǵan sýǵa túsetin kıimde perftoroktan qyshqylynyń deńgeıi kompanııa belgilegen normadan da artyq bolǵandyǵy anyqtaldy. Al Primark fırmasynyń balalar fýtbolkasyndaǵy sýret tańbasynyń 11 paıyzy ftalattan turady. Bul zat qorshaǵan ortaǵa taraǵan kezde adamnyń reprodýktıvti, gormonaldy nemese ımmýndy júıesin jaısyz áser etýi múmkin.
Osyǵan oraı Greenpeace barlyq elderdiń úkimetterin toqyma óndirisinde qaýipti hımııalyq zattardy paıdalanýdy toqtatýǵa shaqyrýda.
