«Túrli kózqaras — birtutas ult»: Toqaev Halyq Keńesiniń basty maqsatyn atady
ASTANA. KAZINFORM — Halyq Keńesinde el yntymaǵyn kúsheıte túsetin tıimdi, aldyn ala muqııat zerttelgen bastamalar júzege asyrylady. Memleket basshysy Qasym-Jomart Toqaev Qazaqstan Halyq Keńesiniń birinshi sessııasynda jańa organnyń basty maqsattaryn atady.
— Ýaqyt bir orynda turmaıdy, bul — ómirdiń zańy. Sondyqtan, zamannyń turpaty da, talaby da ózgerip otyrady. Órkenıetti el bolý — jahan kóshinen qalmaı, únemi básekege qabiletti bolý degen sóz. Biz ulttyq sana-sezimge serpilis berip, jurtymyzdy ortaq múddege jumyldyrý úshin qoǵamdyq dıalogty odan ári damyta túsýimiz qajet. Qazaqstan Halyq Keńesin qurýdaǵy basty maqsatymyz da — osy, — dep atap ótti Memleket basshysy.
Prezıdenttiń aıtýynsha, el tarıhynda alǵash ret qoǵam múddesi jolynda eńbek etip júrgen túrli toptaǵy adamdar bir qurylym aıasynda birikti.
Muny «Túrli kózqaras — birtutas ult» tujyrymdamasynyń is júzindegi naqty kórinisi dep aıtýǵa bolady.
— Qazaqstan Halyq Keńesiniń qurylýy jalpyulttyq birligimizdiń anaǵurlym nyǵaıyp, ınstıtýtsıonaldyq sıpatqa ıe bolǵanyn kórsetti. Osylaısha, Qazaqstan Halyq Keńesinde el yntymaǵyn kúsheıte túsetin tıimdi, aldyn ala muqııat zerttelgen bastamalar júzege asyrylady. Osy oraıda, Qazaqstan Halyq Keńesiniń konstıtýtsııalyq mártebesine taǵy da nazar aýdarǵym keledi. Bul qadam orasan zor múmkindikterge jol ashady, — dedi Q. Toqaev.
Buǵan deıin Prezıdent bir jylda Qazaqstanda eldiń saıası júıesi men memlekettik basqarýyna eleýli ózgeris ákelgen aýqymdy reformalar júzege asqanyn aıtqan edi.
