«Turkvizyon-2014» konkýrsyndaǵy jeńisimdi Elbasymyzǵa arnaımyn - J. Duǵalova

ASTANA. QazAqparat - «Turkvizyon-2014» konkýrsyndaǵy jeńisimdi Qazaqstannyń Tuńǵysh Prezıdenti, Elbasy Nursultan Nazarbaevqa arnaımyn. Bul týraly búgin Ortalyq kommýnıkatsııalar qyzmetinde ótken brıfıngte Tatarstannyń Qazan qalasynda ótken halyqaralyq «Turkvizyon-2014» án baıqaýynda Qazaqstan namysyn qorǵap, bas júldeni utyp alǵan Janar Duǵalova aıtty.

"Túrki áleminde ótken dúbirli dodada baǵymyz jandy. Qýanyshpen, jeńispen oraldyq. Ánshi retinde, elimniń patrıoty retinde men úshin budan asqan baqyt joq. Saıysta elimizdiń bedeli men abyroıyn asqaqtatýǵa barymdy saldym. Ata-babamnyń rýhyna arnap shyǵarǵan ánim jeńis ákeldi", - dep atap ótti ol.

Ánshiniń aıtýynsha, Qazaqstannyń mundaı iri konkýrstarǵa qatysýy - elimizdiń beıbit ómir súrýiniń arqasy.

Búginde biz beıbit elde ómir súrip jatyrmyz. Elimizdi, Elbasymyzdy búkil álem biledi. Osyndaı halyqaralyq saıystarǵa baryp óner kórsetýimizdiń ózi Elbasymyzdyń syndarly saıasatynyń arqasynda dep oılaımyn. Jáne de bul jeńiske Tuńǵysh Prezıdent kúni qarsańynda qol jetkendikten, men bul jeńisimdi Tuńǵysh Prezıdentimizge, elbasymyzǵa arnaımyn!" - dedi J. Duǵalova.

Aıta keteıik, fınalda úshinshi bolyp óner kórsetken Janar Duǵalova 225 upaı jınady. Ol baıqaýda Rınat Zaıytovtyń sózine jazylǵan tól týyndysy "Іzin kórem" ánin oryndady.

Janar jartylaı fınaldan soń úshinshi orynda turǵan bolatyn. Ol aqtyq saıysta ekinshi oryndaǵy Tatarstan ánshisinen 24 upaı artyq jınady.

Fınalda ánshi qyz kóz jasyna erik berip, qazaq eliniń baıraǵyn kókke kóterdi.