Túrkistan oblysy jańa taǵaıyndalǵan ákiminiń aldynda qandaı mindetter tur
ASTANA. KAZINFORM - Premer-mınıstr Oljas Bektenov pen Prezıdent Ákimshiliginiń basshysy Aıbek Dádebaı Túrkistan oblysy máslıhatynyń jınalysyna qatysty, dep habarlaıdy Úkimettiń baspasóz qyzmeti.
Depýtattarǵa Memleket basshysynyń Túrkistan oblysynyń ákimi laýazymyna eki kandıdat usyný týraly haty oqyldy. Qaraýǵa Túrkistan oblysy ákiminiń orynbasary Nuralhan Kósherovtiń jáne Sozaq aýdanynyń ákimi Muhıt Turysbekovtiń kandıdatýralary usynyldy. Saılaý komıssııasy ashyq daýys berý qorytyndysyn shyǵaryp, 288 daýystyń 224-i Nuralhan Kósherovke berildi.
Máslıhat jınalysynyń qorytyndysyna sáıkes, QR Prezıdentiniń tıisti Jarlyǵymen Nuralhan Oralbaıuly Kósherov Túrkistan oblysynyń ákimi bolyp taǵaıyndaldy.
Oblys aktıvimen kezdesýde Premer-mınıstr Oljas Bektenov Darhan Satybaldyǵa óńirdiń damýyna qosqan úlesi úshin alǵys aıtyp, aldaǵy qyzmetine tabys tiledi.
Premer-mınıstr óńir aktıvine jańa ákimdi tanystyra kele, Memleket basshysynyń oblys basshylyǵy aldyna qoıǵan mindetterine toqtaldy.
Prezıdenttiń Ana tili gazetine bergen suhbatynda aıtylǵan ekonomıkany nyǵaıtý jáne halyqtyń turmys sapasyn jaqsartý maqsaty aıasynda, basym baǵyttar qatarynda ekonomıkany ártaraptandyrý jáne ónimdi jańa jumys oryndaryn qurý arqyly klasterlik óndiriske kóshý, «TURAN» AEA men óńirdiń jalpy ınvestıtsııalyq tartymdylyǵyn arttyrý, kólik-logıstıkalyq áleýetti ashý jáne AÓK damýyn arttyrý máseleleri atap ótildi. Halyqty qoljetimdi ári sapaly aýyz sýmen jáne azyq-túlik ónimderiniń turaqty baǵasyn qamtamasyz etý, ınjenerlik ınfraqurylymdy jańǵyrtý boıynsha birqatar mindetter qoıyldy.
Oblys ortalyǵy – Túrkistannyń tarıhı ári rýhanı mańyzdylyǵyn eskere otyryp, mádenı murany saqtaýǵa jáne túrki áleminiń baýyrlas halyqtary arasyndaǵy baılanysty nyǵaıtýǵa, sondaı-aq týrızm salasyn damytýǵa erekshe kóńil bólý tapsyryldy.
Osyǵan deıin Túrkistan oblysynyń ákimi taǵaıyndalǵanyn habarladyq.