Túrkistannyń «Turan» fýtbol klýby jeke menshikke qashan beriledi
TÚRKІSTAN. KAZINFORM – Túrkistan oblysynda «Turan» fýtbol klýbyn jekeshelendirý boıynsha birqatar ınvestormen kelissóz júrgizilip jatyr.
Oblystyq dene shynyqtyrý jáne sport basqarmasynyń málimetinshe, jekeshelendirý protsesin tıimdi júzege asyrý úshin tıisti is-shara jospary ázirlengen.
– Qazirgi tańda «Turan» fýtbol kásibı klýbyn básekelestik ortaǵa berý boıynsha áleýetti ınvestorlarmen kelissóz júrgizilip jatyr. Jaqyn arada bul másele sheshimin tabady. Kelisimge qol jetkizilgennen keıin naqty ınvestordy habarlaımyz, – delingen basqarmanyń baspasóz qyzmeti usynǵan jaýapta.
Vedomstvonyń habarlaýynsha, fýtbol klýbyn jekeshelendirýge nıetti úmitkerlerdiń qatarynda FlyArystan kompanııasy da bar.
Sondaı-aq «Turan» kásibı fýtbol klýby» MKQK-da kelisimshart negizinde jumys isteıtin bapkerlik quram men fýtbolshylardyń eńbek sharttary maýsymnyń aıaqtalýyna jáne merziminiń jetýine baılanysty 2025 jyldyń jeltoqsan aıynda toqtatylǵan.
– Táýelsiz baǵalaýshy – «Capital consult» kompanııasy tarapynan klýbtyń keshendi múlik retindegi naryqtyq quny anyqtaldy. Qyzmet beıinin saqtaý jónindegi sharttary jáne tenderge qatysýshylarǵa qoıylatyn talaptary bekitildi. Qujattamalary bekitilip, tender ótkizý týraly aqparattyq habarlamalar memlekettik múlik tizilimine engizilip, 12 aqpan kúni tender jarııalandy. Qorytyndysy 15 jumys kúni ishinde anyqtalyp, jeńimpazben kelisim-shart túziledi, – delingen vedomstvo aqparatynda.
Budan buryn «Ordabasy» fýtbol klýbynyń jańa prezıdenti taǵaıyndalǵanyn jazǵan edik.
