Túrkistannyń Sozaq aýdanynda ǵasyr jasaǵan qart jaýynger turady

ASTANA. KAZINFORM — Maıdanger Myrzahmet Jylysbaevtyń jasy 99-ǵa kelse de, áli tyń, dep habarlaıdy Jibek Joly telearnasy.

түркістандық ардагер
Фото: Видеодан скриншот

Túrkistan oblysy Sozaq aýdanynan 1941-45 jyldar aralyǵynda soǵysqa 6 myń sarbaz attanǵan. Qazir osy myńdaǵan jaýyngerdiń ishinen kózi tiri bireýi ǵana qaldy. Maıdanger Myrzahmet Jylysbaevtyń jasy 99-ǵa kelse de, áli tyń. Kóńili sergek. 

Myrzahmet aqsaqal soǵysqa attanǵan kezde nebári 18 jastaǵy bozbala edi. Sondyqtan bolar 1944 jyldyń qarasha aıy onyń máńgi esinde. Kolhozdaǵy saýaty joq eresekterdi hat tanýǵa úıretip júrgen ony bir túnde maıdanǵa alyp ketedi. Ardager urys alańynda № 92 avtoatqyshtar polky quramynda soǵysqan.

Myrzahmet Jylysbaev soǵysqa barýdan esh qoryqpaǵanyn aıtady.

— Esh qoryqpadym. Óıtkeni bizdiń aldymyzdaǵy maqsat qalaıda nemis fashısterin jeńý kerek. Otanymyzdy qorǵaý kerek. Sondyqtan men nesine qorqamyn. Qoryqsam, suranbaımyn da, barmaımyn da ǵoı. Biz soǵystyń aıaq jaǵynda bardyq. Biraq Baýyrjan Momyshulynyń ózi aıtqan ǵoı, «soǵysqa bir kirip shyqqannyń ózi erlik dep». Sondaı erlikterdiń ishinde boldyq, — dedi soǵys ardageri.

Soǵystaǵy bes aı bozbala Myrzahmetti erte eseıtti. Birneshe qandy shaıqastyń kýási bolyp, «jeńistiń habaryn estigende menen baqytty jan bolmady» deıdi qarııa. Sebebi ákesinen erte aıyrylǵan ol jalǵyz anasyn asyraýdy maqsat etipti.

Ardagerdiń uly Kenjebek Jylysbaev ákesiniń barlyq bala-shaǵasyna janashyr ekenin aıtty.

— «Meniń aldymda elge oralyp, sheshemizge qaraımyn, asyraımyn degen aldyma qoıǵan mindet boldy» dep aıtyp otyrady. Ákemiz barlyq bala-shaǵasyna janashyr, — dedi qarııanyń balasy.

Myrzahmet Jylysbaev soǵystan keıin elge oralǵan soń ustazdyq qyzmetin jalǵastyrdy. Ol ómiriniń 46 jylyn ustazdyq qyzmetke arnaǵan. Búginde jarymen birge 13 ul-qyzdan 47 nemere, 97 shóbere súıip otyr. Ardager bos ýaqytynda ómirden kórgen-bilgenderin qaǵaz betine túsirip ermek qylady, odan qalsa óziniń ósıeti men oı-tujyrymdary jınaqtalǵan «Urpaqqa amanat» atty kitabyn shyǵarǵan.

Osyǵan deıin almatylyq soǵys ardageri Vasılıı Zınchenko 101 jasqa tolǵanyn jazdyq.

Сейчас читают