Túrkistannyń eski qala aýmaǵynda paıdalanylmaı turǵan ǵımarattar qalaı ózgeredi
TÚRKІSTAN. KAZINFORM — Túrkistan qalasynyń eski shahar aýmaǵy men temirjol vokzaly mańyndaǵy birneshe tarıhı ǵımarat tozyp, paıdalanýsyz qalǵan. Aldaǵy ýaqytta olardy tarıhı kelbetin saqtaı otyryp, murajaı, dámhana jáne mádenı-týrıstik aımaqqa aınaldyrý josparlanyp otyr.
Kóne shahardyń Abylaıhan kóshesindegi «Jolaýshylar kóligi ortalyq dırektsııasy» ǵımaratynda murajaı ashylyp, kelýshilerge arnalǵan dámhana men fýdkort ornalastyrý kózdelgen. Sol kóshedegi «Brıgadashylar úıi» ǵımaraty da qaıta jańǵyrtylyp, temirjol salasynyń tarıhyn dáripteıtin murajaı men shaǵyn dámhana ashylmaq.
— Táýkehan kóshesinde ornalasqan sáýlettik nysandar kesheni de nazarǵa alyndy. Jalpy aýmaǵy 0,42 gektar bul aýmaqta 4 ǵımarat ornalasqan. Sonymen qatar munda 2500 sharshy metrlik skver bar. Jobalyq josparǵa sáıkes, ǵımarattardyń sáýlettik beınesi saqtalyp, olar murajaı retinde paıdalanylady jáne temirjol baǵytyndaǵy skver retinde abattandyrylady, — dep habarlady oblys ákiminiń baspasóz qyzmeti.
Osy oraıda, oblys ákimi Nuralhan Kósherov temirjol vokzaly mańy men eski shahardy aralap, tarıhı nysandardy týrıstik jáne mádenı baǵytta damytý máselesin qarady. Jobalardyń júzege asýy qalaǵa kelgen týrıster úshin jaıly orta qalyptastyryp, Túrkistannyń týrıstik áleýetin arttyrmaq.
Budan buryn ǵasyrdan asqan Túrkistan vokzalyna ǵylymı restavratsııa jasalatynyn jazǵan edik.