Túrkistannan teriskeıge 3555 otbasy qonys aýdardy
Túrkistannan teriskeıge 3555 otbasy qonys aýdardy. Bul týraly Túrkistan oblysy ákiminiń orynbasary Beısen Tájibaev málimdedi, dep habarlaıdy Kazinform.
2015-2023 jyldary aralyǵynda Túrkistan oblysynan elimizdiń jumys kúshi jetispeıtin Soltústik óńirlerge 3555 otbasy, ıaǵnı 13 737 adam qonys aýdarǵan. Munyń ishinde 475 otbasy, ıaǵnı 1953 adam ótken jyly kóship bardy. Túrkistannan teriskeıge qonys aýdarǵandardyń ishinde jańadan kásip ashqandar, tipti ony keńeıtkender bar. Turaqty jumysqa ornalasyp, kúnkórisin arttyrǵandar da jeterlik.
«Jalpy, «Qýatty óńirler - el damýynyń draıveri» ulttyq jobasy aıasynda 2015 jyldan beri Túrkistan oblysynan Soltústik aımaqtarǵa halyqty qonystandyrý jumystary turaqty júrgizilip, nasıhattalyp keledi. Oblysymyzda jyl saıyn birneshe ret aqparattyq-túsindirý jumystary men bos jumys oryndary jármeńkeleri uıymdastyryldy. Bizdiń belsendi azamattarymyz da qonys aýdarǵan otbasylardyń halimen tanysý maqsatynda issaparlarǵa baryp keldi. Nátıjesinde edáýir progress baıqalady. Sondyqtan tıisti sharalar toqtatylmaıdy», - dedi Beısen Tájibaev.
Bıyl Ońtústikten Soltústikke qonys aýdarýǵa nıetti azamattar úshin 7050 kvota bólinip otyr. Ótken jyly 6727 kvota belgilengen bolatyn. Salystyrmaly túrde qarar bolsaq, kvota sany 554-ke kóbeıgen. 2024 jyly qonys aýdarýǵa ádettegideı teriskeıdiń 7 óńiri bekitilgen. Soltústik Qazaqstan oblysyna - 2702, Pavlodar óńirine - 2603, Qostanaıǵa - 950, Shyǵys Qazaqstanǵa - 372, Abaı aımaǵyna - 255, Ulytaýǵa - 132 jáne Qaraǵandyǵa - 36 adam kóshe alady.
«Memleket tarapynan tıisti qoldaýlar kórsetilip keledi. Kóshýge nıetti otbasy múshelerine bir rettik qarjylaı kómek bar. 70 AEK mólsherinde jáne alǵashynda úı jaldaýǵa qarajat beriledi. Odan bólek, qysqa ýaqytqa kásibı oqýǵa jiberilip, jumysqa ornalasý, jeńildikpen úı alý boıynsha sharalar uıymdastyrylady. Sońǵy jyldary ulttyq múddeni kózdeıtin jobany júrgizýge birqatar el janashyrlary atsalysyp jatyr. Bıyl da bul baǵdarlamany baıanda etýge atsalysqysy keletin azamattardyń artqanyn qalar edik. Ortaq isten shet qalmaı, jumylǵanda ǵana nátıjeli bolary anyq», - dedi Beısen Tájibaev.
