Túrkistannan Ózbekstannyń úsh qalasyna jańa áýe reısi ashylady
TAShKENT. KAZINFORM – Jeltoqsan aıynan bastap SCAT áýe kompanııasynyń ushaqtary Túrkistannan Ózbekstannyń Úrgenish, Buhara jáne Samarqand shaharlaryna tikeleı reıs oryndaıdy, dep habarlaıdy Kazinform agenttiginiń menshikti tilshisi.
Uzbekistan Airports kompanııasynyń málimetinshe, Túrkistan — Úrgenish — Túrkistan baǵyty boıynsha reıs 1 jeltoqsannan bastap jolǵa qoıylady. Josparǵa saı, ushaqtar dúısenbi, juma jáne jeksenbi kúnderi jolaýshylar tasymaldaıdy.
Al Túrkistan — Buhara — Túrkistan baǵytyndaǵy alǵashqy áýe reısi 2 jeltoqsanda oryndalady. Ol seısenbi, beısenbi jáne senbi kúnderi júzege asyrylmaq.
Sondaı-aq, Túrkistan — Samarqand — Túrkistan baǵyty boıynsha turaqty reıster 3 jeltoqsannan bastalady. Ushaqtar ár sársenbi, juma jáne jeksenbi kúnderi jolaýshylardy tasymaldamaq.
Komanııadan atap ótkendeı, jańa marshrýttardy ashý Qazaqstan men Ózbekstan arasyndaǵy óńiraralyq baılanystardy nyǵaıtyp, týrızmdi damytýǵa serpin beredi.
Málim bolǵandaı, búginde atalǵan reıster boıynsha bıletter satylymǵa shyqty.
Eske salaıyq, bıyl 3 shildede Ózbekstannyń Centrum Air áýe kompanııasy Núkis — Aqtaý — Núkis baǵyty boıynsha jańa turaqty reısti júzege asyra bastady. Sondaı-aq, mamyrda Astana-Samarqand baǵyty boıynsha jańa áýe reısi ashyldy.