Túrkistannan Qostanaıǵa qonys aýdarýǵa shaqyrdy
TÚRKІSTAN. KAZINFORM - «Qýatty óńirler - el damýynyń draıveri» ulttyq jobasy aıasynda Qostanaı oblysy Qamysty aýdany ákimdiginiń orynbasarlary men aýyldyq okrýg ákimderi jumys kúshi mol óńirlerdiń áleýetti qatysýshylaryn anyqtaý maqsatynda arnaıy is-saparmen Túrkistan oblysyna keldi.
Otyrar aýdanynyń halqymen kezdesken qostanaılyqtar Aralkól, Bestóbe, Adaıev, Drýjba, Altynsarın, Klachkov aýyldaryna qajetti jumys oryndaryn usyndy. Atap aıtar bolsaq, aımaqqa mehanızator, malshy, júrgizýshi, dánekerleýshi, baqtashy, tabýnşık, aǵash sheberleri, býhgalter, aspazshy, slesar, elektrık, feldsher, aýyl kitaphanashysy, agronom sekildi mamandar kerek. Al, kóship barýshylarǵa joǵary deńgeıde jaǵdaılar jasalady.
Memlekettik baǵdarlama boıynsha aqparattyq-túsindirý jumystaryn júrgizgen nasıhat tobynyń ókilderi bos jumys oryndaryna qonys aýdarýshylardy shaqyrdy. Kópshiliktiń suraqtaryna jaýap berip, qonys aýdarý boıynsha aqparattarmen tanystyrdy.
Atalǵan jıyn Arys qalasynyń aýmaǵynda da jalǵasty. Qala men qalaǵa qarasty aýyl turǵyndarmen ótken kezdesýde qonys aýdarýshylarǵa kórsetiletin jaǵdaılar túsindirilip, bos jumys oryndary usynyldy.Nátıjesinde Arystan 17 adam qonys aýdarýǵa nıet bildirdi.
«Qýatty óńirler-el damýynyń draıveri» ulttyq jobasy aıasynda jumys kúshi mol óńirlerdiń áleýetti qatysýshylaryn anyqtaý maqsatynda arnaıy is-saparmen kelgen qostanaılyqtar Túrkistan jáne Kentaý qalalarynda jáne Saýran men Sozaq aýdandarynda bolyp, jergilikti turǵyndarmen kezdesti.
Kezdesýge jalpy júzden astam adam kelip, qonys aýdarý boıynsha aqparattarmen tanys boldy.
Aıta keteıik, Qazaqstan Eńbek jáne halyqty áleýmettik qorǵaý mınıstrligi 2024 jylǵa respýblıka boıynsha 7050 kvota bólip, qandastar men qonys aýdarýshylar úshin memlekettik qoldaý kórsetetin 7 oblys belgilengen bolatyn. Olardyń qatarynda Soltústik Qazaqstan oblysy (2 702 adam), Pavlodar oblysy (2 603 adam), Qostanaı oblysy (950 adam), Shyǵys Qazaqstan oblysy (372 adam), Abaı oblysy (255 adam), Ulytaý oblysy (132 adam), Qaraǵandy oblysy (36 adam) bar.
Bólingen kvota negizinde osy jyldyń 8 aıynda Túrkistan oblysynan 288 otbasydan 1 116 adam qonys aýdardy. Naqty kórsetsek, Shyǵys Qazaqstan oblysyna 18 otbasy (71 adam), Qostanaı oblysyna 18 otbasy (71 adam), Pavlodar oblysyna 127 otbasy (592 adam), Soltústik Qazaqstan oblysy 110 otbasy (318 adam), Qaraǵandy oblysyna 2 otbasy (11 adam), Abaı oblysyna 8 otbasy (23 adam), Ulytaý oblysyna 5 otbasy (30 adam).
Jalpy elimiz boıynsha 3 494 qonys aýdarǵandardyń 32%-y Túrkistan oblysynyń úlesinde. Olardyń ishinde eńbekke jaramdy 538 adamnyń 304-i jumysqa ornalasqan. 2015 jyldan beri jumys kúshi az Soltústik óńirlerine halqy tyǵyz ornalasqan Ońtústik aımaqtardan azamattardy kóshirý jumystary nátıjesinde búgingi kúnge deıin 14 874 adam nemese 3 358 otbasy qonys aýdarǵan.
Memleket Soltústik oblystarǵa qonys aýdarǵandardyń otbasy múshelerine bir ret 70 AEK (258 440 teńge) mólsherinde aqsha, alǵashqy ýaqytta úı jaldaýǵa qarjy beredi. Budan bólek, bılik olardy qysqa ýaqytqa kásibı oqýǵa jiberip, jumysqa turǵyzýy, jeńildikpen baspana alýǵa kómektesýi tıis. Al qonys aýdarǵandarǵa jumys usynǵan jumys berýshilerge 400 AEK (1 476 800 teńge) sýbsıdııa beriledi.
