Túrkistannan Astanaǵa «Birlik kerýeni» kele jatyr
TÚRKІSTAN. KAZINFORM - Astana qalasynda 8-13 qyrkúıek aralyǵynda V Dúnıejúzilik kóshpendiler oıyndary ótedi. Osyǵan oraı Túrkistan oblysynan «Birlik kerýeni» jobasy uıymdastyrylyp, elordaǵa jolǵa shyqty.
Іs-shara barysynda Túrkistan oblysy ákiminiń orynbasary Ertaı Altaev Qoja Ahmet ıAsaýı kesenesiniń ishindegi Qudyqhana bulaq sýy quıylǵan torsyqty Qazaqstan Respýblıkasy Ulttyq qurama komandasynyń múshesi Ǵalymjan Izjanov tapsyrdy.
«Dúnıejúzilik Kóshpendiler oıyndarynyń ótý baǵyty sporttyq, mádenı jáne ǵylymı baǵdarlamalar boıynsha júzege asady. Sondyqtan mańyzdy sharanyń ótýine óńir sportshylary ǵana emes, mádenıet jáne ǵylym ókilderi de atsalysatyn bolady. Bul jobada ár oblystyń beligili sportshylary bastaǵan kerýen jergilikti jerdegi qasıetti bulaqtar men qudyqtardan sý alyp, arnaıy torsyqpen Astana qalasyna jetkizetin bolady. Osyǵan oraı, sý alý rásimin ótkizýde Túrkistan qalasyndaǵy Qoja Ahmet ıAsaýı kesenesiniń ishindegi Qudyqhanabulaq kózi tańdalyp otyr. Qazir ǵana bizdiń sportshylarymyz bastaǵan arnaıy top qudyqhana ishinen sý alyp, aldaryńyzǵa keldi. Men osy oraıda, kóshpendiler oıyndary ótetin negizgi alańǵa oblystyń ystyq sálemin, qasıetti sýdy jetkizetin kerýenge sáttilik tileımin! Bul dodada el namysyn qorǵaıtyn oblys sportshylary qýantarlyq nátıje kórsetedi dep senemin», – dedi Ertaı Altaev
Aıta keteıik, 5-shi Dúnıejúzilik kóshpendiler oıyndary sporttyń 21 túri boıynsha ótedi. Oǵan álemniń 89 elinen 2000-ǵa jýyq sportshy, bapkerler men ókilder qatysyp, negizgi júldelerdi sarapqa salmaq. Onyń ishinde sporttyń 13 túri boıynsha Qazaqstan quramasynyń sapynda Túrkistan oblysynan 29 sportshy qatysady.
