Túrkistannan Ábý-Dabıge 20 000 teńgemen barýǵa bolady

Túrkistannan Abý-Dabıge jańa áýe reısi ashyldy, dep habarlaıdy Kazinform.

Reıs bıletteri 2023 jyldyń qarasha aıynan bastap wizzair.com saıty men mobıldi qosymshasynda satylymǵa shyqqan. Baǵasy – 19 myń teńge shamasynda. Bul BAÁ-niń 159 dırhamyna teń. 

Ushaq Túrkistan qalasynan Ábý-Dabıge 16 qańtardan bastap ushady. Reıster aptasyna 3 ret — seısenbi, beısenbi, senbi kúnderi zamanaýı «AirBus 321» jáne «A321 ceo» ushaqtary arqyly oryndalady. Túrkistan áýejaıynyń mamandary usynǵan málimetke súıensek, qazirgi kezde birinshi reıske 168 áýe bıleti satylǵan. 

Jolaýshylar reısti ushý ýaqytynan 3 saǵat buryn eshqandaı komıssııasyz ózgerte alady. Al osy baǵytta ushý ýaqyty — 3 saǵat. 

Jańa baǵyt qos qala turǵyndary men qonaqtary úshin týrıstik múmkindikterdi keńeıtedi.

Aıta keteıik, qazirgi tańda Túrkistan halyqaralyq áýejaıy Ystambul jáne El-Kýveıt jáne elimizdiń Astana, Almaty, Aqtaý, Aqtóbe, Oral jáne Qaraǵandy áýe baǵyttaryna qyzmet kórsetip keledi. 

Eske sala keteıik, budan buryn 16 qańtardan bastap «Túrkistan – Ábý-Dabı» áýe baǵyty ashylatynyn jazǵan bolatynbyz.